26 പേരുടെ മരണത്തിനിടയാക്കിയ പഹൽഗാം ഭീകരാക്രമണത്തിന്റെ അന്വേഷണത്തിന് നേതൃത്വം നൽകിയ ദേശീയ അന്വേഷണ ഏജൻസി (എൻഐഎ) ഡിഐജി സന്ദീപ് ചൗധരിക്ക് കേന്ദ്ര ആഭ്യന്തര മന്ത്രിയുടെ വിശിഷ്ട സേവന മെഡൽ (കേന്ദ്ര ഗൃഹമന്ത്രി ദക്ഷതാ പതക്) പ്രഖ്യാപിച്ചു. 2026-ലെ അന്വേഷണ മികവിനുള്ള പുരസ്‌കാരപ്പട്ടിക കേന്ദ്ര ആഭ്യന്തര മന്ത്രാലയം പുറത്തുവിട്ടപ്പോഴാണ് സന്ദീപ് ചൗധരിയുടെ ശ്രദ്ധേയമായ നേട്ടം വ്യക്തമായത്.
2012 ബാച്ച് എജിഎംയുടി (AGMUT) കേഡർ ഐപിഎസ് ഉദ്യോഗസ്ഥനായ സന്ദീപ് ചൗധരി, 2025 ഏപ്രിൽ 22-ന് ജമ്മു കശ്മീരിലെ പഹൽഗാമിലുള്ള ബൈസാരൻ പുൽമേട്ടിൽ നടന്ന ഭീകരാക്രമണ കേസിന്റെ ചീഫ് അന്വേഷണ ഉദ്യോഗസ്ഥനായിരുന്നു. വിനോദസഞ്ചാരികളടക്കം 26 പേർ കൊല്ലപ്പെട്ട പ്രസ്തുത ദാരുണ സംഭവത്തിൽ കേസ് ഏറ്റെടുത്ത എൻഐഎ സംഘം അതിവേഗത്തിലാണ് അന്വേഷണം പൂർത്തിയാക്കിയത്. തുടർന്ന് ലഷ്കർ-ഇ-തൊയ്ബ തലവൻ ഹാഫിസ് സയീദ്, സാജിദ് ജാട്ട് എന്നിവരുൾപ്പെടെയുള്ള ഭീകരർക്കെതിരെ കൃത്യമായ തെളിവുകളോടെ കുറ്റപത്രം സമർപ്പിക്കാൻ സന്ദീപ് ചൗധരിയുടെ നേതൃത്വത്തിലുള്ള സംഘത്തിന് സാധിച്ചു.
എൻഐഎയിൽ എത്തുന്നതിന് മുമ്പ് ശോപിയാൻ, അനന്ത്‌നാഗ്, ശ്രീനഗർ എന്നിവിടങ്ങളിൽ സീനിയർ സൂപ്രണ്ട് ഓഫ് പോലീസായി (എസ്എസ്പി) സേവനമനുഷ്ഠിച്ച അദ്ദേഹം നിരവധി ഭീകരവിരുദ്ധ ഓപ്പറേഷനുകൾക്ക് നേതൃത്വം നൽകിയിട്ടുണ്ട്. അതിർത്തിയിലെ തീവ്രവാദവിരുദ്ധ പ്രവർത്തനങ്ങളിലെ ധീരതയ്ക്കായി ഒൻപത് തവണയാണ് അദ്ദേഹം വീരതാ മെഡലുകൾ (Gallantry Medals) നേടിയിട്ടുള്ളത്.
ചീഫ് ഓഫ് ആർമി സ്റ്റാഫ്, നോർത്തേൺ കമാൻഡ് ജിഒസി-ഇൻ-സി, വെസ്റ്റേൺ എയർ കമാൻഡ് എന്നിവരുടെയും സിആർപിഎഫ്, ജമ്മു കശ്മീർ പോലീസ്, ബിപിആർആൻഡ് ഡി, എൻഐഎ ഡിജിമാരുടെയും കമ്മൻഡേഷൻ ഡിസ്കുകളും അദ്ദേഹത്തിന് ലഭിച്ചിട്ടുണ്ട്. 2021-ൽ അന്നത്തെ ഡെപ്യൂട്ടി സൂപ്രണ്ട് ഓഫ് പോലീസ് ദേവേന്ദർ സിംഗിനൊപ്പം ഹിസ്ബുൾ മുജാഹിദീൻ കമാൻഡർ സയ്യിദ് നവീദ് മുഷ്താഖ് എന്ന നവീദ് ബാബുവിനെ അറസ്റ്റ് ചെയ്ത നിർണായക ഓപ്പറേഷന് നേതൃത്വം നൽകിയതും സന്ദീപ് ചൗധരിയായിരുന്നു. അർഹിച്ച അംഗീകാരമാണ് അദ്ദേഹത്തെ തേടിയെത്തിയതെന്ന് സഹപ്രവർത്തകരും വ്യക്തമാക്കി.
