അമേരിക്കൻ പ്രസിഡന്റ് ഡൊണാൾഡ് ട്രംപിന് ശക്തമായ മുന്നറിയിപ്പുമായി ഇറാന്റെ പരമോന്നത നേതാവ് മൊജ്തബ ഖമനേയി. ഇറാനെതിരെ അമേരിക്കയോ ഇസ്രയേലോ വീണ്ടും സൈനിക ആക്രമണം നടത്തിയാൽ അതിന് ഭൂമിശാസ്ത്രപരമായ അതിരുകളില്ലാത്ത തിരിച്ചടി നൽകുമെന്ന് അദ്ദേഹം മുന്നറിയിപ്പ് നൽകി. ശനിയാഴ്ച ഔദ്യോഗിക ടെലിഗ്രാം അക്കൗണ്ടിലൂടെ പുറത്തുവിട്ട പ്രസ്താവനയിലാണ് ഖമനേയി നിലപാട് വ്യക്തമാക്കിയത്. ശത്രുക്കൾ വീണ്ടും സൈനികമോ ഭീകരപ്രവർത്തനങ്ങളോ നടത്തിയാൽ സംഘർഷം എപ്പോൾ അവസാനിക്കണമെന്നും അതിന്റെ വ്യവസ്ഥകൾ എന്തായിരിക്കണമെന്നും തീരുമാനിക്കുന്നത് ഇറാനായിരിക്കുമെന്നും അദ്ദേഹം പറഞ്ഞു. ഏത് തരത്തിലുള്ള ഭീഷണിക്കും ഉടൻതന്നെ ശക്തമായ തിരിച്ചടി നൽകാൻ സൈന്യത്തിന് നിർദേശം നൽകിയതായും റിപ്പോർട്ടുകൾ വ്യക്തമാക്കുന്നു.
അമേരിക്കയുടെയും ഇസ്രയേലിന്റെയും ഭൗതികവും അഭൗതികവുമായ എല്ലാ ആസ്തികളും ലക്ഷ്യപ്പട്ടികയിൽ ഉൾപ്പെടുത്താനും ഖമനേയി നിർദേശം നൽകിയിട്ടുണ്ട്. സൈനിക ആയുധങ്ങളുടെയും വെടിക്കോപ്പുകളുടെയും ഉൽപ്പാദനം വർധിപ്പിക്കാനും രഹസ്യാന്വേഷണ വിഭാഗത്തിന്റെ പ്രവർത്തനം ശക്തിപ്പെടുത്താനും തദ്ദേശീയ പ്രതിരോധ സംവിധാനങ്ങൾ വികസിപ്പിക്കാനും അദ്ദേഹം ആവശ്യപ്പെട്ടു. പുതിയ അമേരിക്കൻ ആക്രമണം മേഖലയിലുടനീളം യുദ്ധം വ്യാപിപ്പിക്കുമെന്ന് ഇറാൻ സൈനിക വക്താവ് മുഹമ്മദ് അക്രാമിനിയയും മുന്നറിയിപ്പ് നൽകി. ഇറാൻ വിദേശകാര്യമന്ത്രി അബ്ബാസ് അരാഗ്ചിയും രാജ്യത്തെ ആക്രമിക്കാൻ ശ്രമിക്കുന്നവർക്ക് ശക്തമായ മറുപടി നൽകുമെന്ന് വ്യക്തമാക്കി.
അതേസമയം, സംഘർഷം വീണ്ടും രൂക്ഷമാകാതിരിക്കാൻ നയതന്ത്ര നീക്കങ്ങളും തുടരുകയാണ്. ഖത്തർ, പാകിസ്ഥാൻ എന്നീ രാജ്യങ്ങൾ ഇരുരാജ്യങ്ങൾക്കുമിടയിൽ മധ്യസ്ഥശ്രമങ്ങൾ നടത്തുന്നുണ്ട്. വെള്ളിയാഴ്ച ഖത്തർ പ്രതിനിധി സംഘം ടെഹ്റാനിലെത്തി ഇറാൻ അധികൃതരുമായി ചർച്ച നടത്തിയിരുന്നു. അമേരിക്കൻ വൈസ് പ്രസിഡന്റ് ജെ.ഡി. വാൻസ് ഇറാൻ സുരക്ഷാ മേധാവി മൊഹ്സെൻ റെസായിക്ക് ട്രംപിന്റെ നിർദേശപ്രകാരം കത്തയച്ചതായും റിപ്പോർട്ടുകളുണ്ട്. ചർച്ചകൾ പുനരാരംഭിച്ച് പുതിയ സൈനിക നീക്കങ്ങൾ ഒഴിവാക്കുകയാണ് ലക്ഷ്യം. എന്നാൽ ഇതുവരെ നിർണായക ധാരണയിലെത്താൻ കഴിഞ്ഞിട്ടില്ല. ഹോർമുസ് കടലിടുക്കിലെ പ്രതിസന്ധി ആഗോള എണ്ണവിതരണത്തെയും ഊർജവിലയെയും ബാധിക്കുന്ന സാഹചര്യത്തിൽ ഇറാന്റെ പുതിയ മുന്നറിയിപ്പ് അന്താരാഷ്ട്ര തലത്തിൽ ആശങ്ക വർധിപ്പിച്ചിട്ടുണ്ട്.
