തൃശൂർ: ഡി വൈ എഫ് ഐ നേതാവ് വിവാഹ വാഗ്ദാനം നൽകി പീഡിപ്പിച്ചെന്ന പരാതിയുമായി പട്ടിക ജാതിക്കാരിയായ യുവതി. ഡി വൈ എഫ് ഐ തൃശൂർ ജില്ലാ കമ്മിറ്റി അംഗം പി എച്ച് നിയാസിനെതിരെയാണ് മതിലകം സ്വദേശിനിയും പാർട്ടി പ്രവർത്തകയുമായ യുവതി പരാതിയുമായി എത്തിയിരിക്കുന്നത്. പരാതി പിൻവലിച്ചില്ലെങ്കിൽ സിപിഎം നിയന്ത്രണത്തിലുള്ള സഹകരണ സ്ഥാപനത്തിലെ ജോലി നഷ്ടപ്പെടുത്തുമെന്ന് നേതാവ് ഭീഷണിപ്പെടുത്തുന്നതായും യുവതി ആരോപിക്കുന്നു.
സംഭവവുമായി ബന്ധപ്പെട്ട് യുവതി നേരത്തെ സിപിഎം തൃശൂർ ജില്ലാ കമ്മിറ്റിക്ക് പരാതി നൽകിയിരുന്നു. പരാതിയിൽ തുടർനടപടികൾ ഉണ്ടായില്ല. ഇപ്പോൾ താൻ മാനസിക രോഗിയാണെന്ന് നിയാസ് പ്രചരിപ്പിക്കുന്നതായും പാർട്ടിക്ക് പേര് ദോഷം ഉണ്ടാവരുതെന്നു കരുതിയാണ് പോലീസിൽ പരാതി നൽകാത്തതെന്നും സ്വകാര്യ മാദ്ധ്യമത്തോട് യുവതി വെളിപ്പെടുത്തി.
സിപിഎം ഇടപെട്ട് നേതാവുമായുള്ള വിവാഹം നടത്തിത്തരണമെന്നും ഇല്ലെങ്കിൽ ആത്മഹത്യ അല്ലാതെ തന്റെ മുന്നിൽ മറ്റ് വഴികളില്ലെന്നും യുവതി പറയുന്നു.
