ദുബായ്: കടലിൽ പോയ 2,50,000 ദിർഹം വില വരുന്ന റോളക്‌സ് ആഡംബര വാച്ച് അര മണിക്കൂറിൽ മുങ്ങിയെടുത്ത് ദുബായ് പോലീസിലെ ഡൈവിങ് ടീം. കഴിഞ്ഞ ദിവസമാണ് സംഭവം ഉണ്ടായത്. പാം ജുമൈറയിൽ കടലിൽ ബോട്ട് യാത്ര നടത്തുന്നതിനിടെയാണ് യുഎഇ പൗരനായ ഹമീദ് ഫഹദ് അലമേരിക്കൊപ്പം ഉണ്ടായിരുന്ന സുഹൃത്തുക്കളിൽ ഒരാളുടെ അരക്കോടിയിലധികം രൂപ വില വരുന്ന റോളക്‌സ് ആഡംബര വാച്ച് കടലിൽ പോയത്.
യുകെയിൽ നിന്നുളള വിനോദസഞ്ചാരിയായ സുഹൃത്ത് കടലിൽ നീന്തി തിരിച്ചുവരുമ്പോൾ കൈയ്യിലുണ്ടായിരുന്ന വാച്ച് അഴിഞ്ഞുപോകുകയായിരുന്നു. വാച്ച് നഷ്ടപ്പെട്ട വിവരം മനസിലാക്കിയതോടെ അലമേരി ദുബായ് പോലീസിൽ അറിയിക്കുകയായിരുന്നു. വെളളത്തിന്റെ ആഴം കണക്കിലെടുത്തപ്പോൾ വാച്ച് തിരിച്ചെടുക്കാനാകുമെന്ന് ഇവർ കരുതിയില്ല.
വിവരങ്ങൾ ദുബായ് പോലീസിനോട് വിശദീകരിച്ചു. മിനിറ്റുകൾക്കുളളിൽ പോലീസിന്റെ ഡൈവിങ് ടീം സ്ഥലത്തെത്തി. അര മണിക്കൂറിനുളളിൽ കടലിന്റെ അടിത്തട്ടിൽ നിന്ന് അവർ വാച്ച് കണ്ടെടുത്തു അലമേരി പറഞ്ഞു. പോലീസിന്റെ ഡൈവിങ് ടീമിനെ കൈയ്യടിയോടെയാണ് ഇവർ വരവേറ്റത്.
Discussion about this post