ജയ്പൂർ : രാജസ്ഥാനിൽ മന്ത്രിസഭാ വിപുലീകരണത്തിന്റെ ഭാഗമായി പുതിയ മന്ത്രിമാർ സത്യപ്രതിജ്ഞ ചെയ്ത് അധികാരമേറ്റു. രാജ്യവർദ്ധൻ റാത്തോഡ്, മദൻ ദിലാവർ അടക്കം 22 പുതിയ മന്ത്രിമാരാണ് ഇന്ന് സത്യപ്രതിജ്ഞ ചെയ്ത് അധികാരത്തിലേറിയത്.
മുഖ്യമന്ത്രി ഭജൻ ലാൽ ശർമയുടെ നേതൃത്വത്തിലുള്ള ബിജെപി സർക്കാരിൽ ആദ്യമായാണ് മന്ത്രിസഭാ വിപുലീകരണം നടത്തുന്നത്. ഉച്ചകഴിഞ്ഞ് രാജ്ഭവനിൽ നടന്ന സത്യപ്രതിജ്ഞ ചടങ്ങിൽ ഗവർണർ കൽരാജ് മിശ്ര മന്ത്രിമാർക്ക് സത്യവാചകം ചൊല്ലിക്കൊടുത്തു.
ഡൽഹിയിൽ കേന്ദ്രനേതാക്കളുമായി ചർച്ച നടത്തിയതിനുശേഷം ആണ് മുഖ്യമന്ത്രി ഭജൻലാൽ ശർമ മന്ത്രിസഭയിലെ പുതിയ അംഗങ്ങളെ തിരഞ്ഞെടുത്തിട്ടുള്ളത്. 200 അംഗ സഭയിൽ 115 സീറ്റുകൾ നേടിയാണ് ബിജെപി രാജസ്ഥാനിൽ അധികാരത്തിൽ എത്തിയിരിക്കുന്നത്.
മുഖ്യമന്ത്രി ഭജൻ ലാൽ ശർമയും ഉപ മുഖ്യമന്ത്രിമാരായ ദിയാ കുമാരിയും പ്രേംചന്ദ് ബൈർവയും ആണ് ആദ്യഘട്ടത്തിൽ മന്ത്രിമാരായി സത്യപ്രതിജ്ഞ ചെയ്തിരുന്നത്.
അഞ്ചാം തവണയും ബിജെപി എംഎൽഎയായ വാസുദേവ് ദേവ്നാനി പതിനാറാം രാജസ്ഥാൻ നിയമസഭയുടെ സ്പീക്കറായും തിരഞ്ഞെടുക്കപ്പെട്ടു.
