ഇന്ത്യയിൽ രാഷ്ട്രീയ പ്രതിഷേധത്തിൽ പങ്കെടുത്ത ബോളിവുഡ് നടൻ ഇമ്രാൻ ഖാനെതിരെ ബോംബെ ഹൈക്കോടതിയുടെ കടുത്ത വിമർശനം. ചീഫ് ഇലക്ഷൻ കമ്മീഷണർ ഗ്യാനേഷ് കുമാറിനെതിരെ ഡൽഹിയിലും മുംബൈയിലും അരങ്ങേറുന്ന പ്രക്ഷോഭങ്ങളുടെ ഭാഗമായി ‘CEC-SIR’ വിഷയത്തിൽ സംഘടിപ്പിച്ച പ്രതിഷേധത്തിൽ പങ്കെടുത്തതിനാണ് യു.എസ് പൗരത്വം ഉള്ള നടന് കോടതിയുടെ രൂക്ഷവിമർശനം ഏൽക്കേണ്ടി വന്നത്. പ്രതിഷേധിക്കാനുള്ള മൗലികാവകാശം ഇന്ത്യൻ പൗരന്മാർക്ക് മാത്രമാണുള്ളതെന്ന് വ്യക്തമാക്കിയ കോടതിക്ക് മുന്നിൽ നടൻ നിരുപാധികം മാപ്പ് അപേക്ഷിച്ചു.
ചീഫ് ജസ്റ്റിസ് മഹേഷ് ചന്ദ്ര ത്രിപാഠിയും ജസ്റ്റിസ് അദ്വൈത് സേത്നയും അടങ്ങിയ ബെഞ്ചാണ് കേസ് പരിഗണിച്ചത്. ഓവർസീസ് സിറ്റിസൺ ഓഫ് ഇന്ത്യ (OCI) കാർഡുള്ള അമേരിക്കൻ പൗരനായ ഇമ്രാൻ ഖാനെ ഉടനടി നാടുകടത്തുന്നതിന് പകരം രാജ്യം വിടാൻ നോട്ടീസ് നൽകിയ ഇന്ത്യയുടെ വിശാലമനസ്കതയെക്കുറിച്ച് ഹൈക്കോടതി ഓർമ്മിപ്പിച്ചു. വിദേശപൗരനായ ഒരാൾ ഇന്ത്യയിലെ ആഭ്യന്തര രാഷ്ട്രീയ വിഷയങ്ങളിലും പ്രതിഷേധങ്ങളിലും പങ്കെടുക്കുന്നത് നിയമവിരുദ്ധമാണെന്ന് ബെഞ്ച് നിരീക്ഷിച്ചു.
കോടതിയുടെ കടുത്ത നിലപാട് വ്യക്തമായതോടെ, ഭാവിയിൽ ഇത്തരത്തിലുള്ള ഒരു പ്രതിഷേധങ്ങളിലും പങ്കാളിയാകില്ലെന്ന് ഇമ്രാൻ ഖാന് വേണ്ടി ഹാജരായ അഭിഭാഷകൻ വെങ്കിടേഷ് ധോണ്ട് ഉറപ്പുനൽകുകയും ഉടനടി കോടതിയിൽ നിരുപാധികം മാപ്പപേക്ഷ സമർപ്പിക്കുകയും ചെയ്തു. മുംബൈയിൽ നടന്ന സി.ഇ.സി വിരുദ്ധ പ്രതിഷേധത്തിൽ പങ്കെടുത്തതിനെ തുടർന്ന് ഒക്ടോബർ 28-നകം ഇന്ത്യ വിട്ടുപോകണമെന്ന് കാണിച്ച് ഫോറിനേഴ്സ് റീജിയണൽ രജിസ്ട്രേഷൻ ഓഫീസ് (FRRO) ഇമ്രാൻ ഖാന് നോട്ടീസ് അയച്ചിരുന്നു. ഈ നോട്ടീസ് ചോദ്യം ചെയ്താണ് നടൻ ഹൈക്കോടതിയെ സമീപിച്ചത്. ഹർജി ഡിസംബർ 7-ലേക്ക് മാറ്റിയ കോടതി, തൽക്കാലത്തേക്ക് നാടുകടത്തൽ നോട്ടീസ് നടപ്പാക്കുന്നത് തടഞ്ഞുകൊണ്ടുള്ള ഇടക്കാല ഉത്തരവ് ഡിസംബർ 7 വരെ നീട്ടി നൽകി.
