പൊലീസിനെ വിമർശിച്ച് സി.പി.എം നേതാവ് ഫെയ്‌സ്ബുക്കിൽ പങ്കുവെച്ച കുറിപ്പിന് ‘ലൈക്ക്’ അടിച്ച ഗ്രേഡ് എസ്.ഐക്ക് സസ്പെൻഷൻ. തിരുവല്ലം പൊലീസ് സ്റ്റേഷനിലെ ഗ്രേഡ് എസ്.ഐ ആർ.പി. അരവിന്ദിനെയാണ് സർവീസിൽ നിന്ന് സസ്പെൻഡ് ചെയ്ത് തിരുവനന്തപുരം സിറ്റി പൊലീസ് കമ്മീഷണർ അടിയന്തര ഉത്തരവിറക്കിയത്. പൊലീസ് സേനയുടെ ഭാഗമായിരുന്നുകൊണ്ട് അതേ സേനയെ ആക്ഷേപിക്കുന്ന പോസ്റ്റിന് പരസ്യമായി പിന്തുണ നൽകിയത് ഗുരുതരമായ അച്ചടക്കലംഘനമാണെന്ന് വിലയിരുത്തിയാണ് ഈ കർശന നടപടി.
എൻഫോഴ്സ്മെന്റ് ഡയറക്ടറേറ്റ് (ഇ.ഡി) പരിശോധനയുമായി ബന്ധപ്പെട്ട് പോലീസിന്റെ പ്രവർത്തനങ്ങളെയും നടപടികളെയും രൂക്ഷമായ ഭാഷയിൽ വിമർശിച്ചുകൊണ്ടായിരുന്നു മുൻ തിരുവനന്തപുരം നഗരസഭാ കൗൺസിലർ കൂടിയായ സി.പി.എം നേതാവ് ഐ.പി. ബിനു സമൂഹമാധ്യമത്തിൽ കുറിപ്പിട്ടത്. മുൻപ് ഇ.ഡി ഉദ്യോഗസ്ഥരെ ആക്രമിച്ച കേസിൽ പ്രതിസ്ഥാനത്തുള്ള വ്യക്തി കൂടിയാണ് ഐ.പി. ബിനു. സർവീസിലിരിക്കുന്ന ഉദ്യോഗസ്ഥൻ ഇത്തരം വിമർശനങ്ങൾ അടങ്ങിയ പോസ്റ്റിനെ അനുകൂലിച്ച് ലൈക്ക് അടിച്ചത് സേനയ്ക്കുള്ളിൽ വലിയ ചർച്ചയായിരുന്നു.
സംഭവത്തിൽ ഡിപ്പാർട്ട്മെന്റ് തലത്തിൽ എസ്.ഐയിൽ നിന്ന് വിശദീകരണം തേടിയിരുന്നെങ്കിലും അത് തൃപ്തികരമല്ലെന്ന് കണ്ടതിനെ തുടർന്നാണ് നടപടിയിലേക്ക് കടന്നത്. പൂർണ്ണമായും നിഷ്പക്ഷതയും പക്ഷപാതരഹിതവുമായ സമീപനവും പുലർത്താൻ ബാധ്യസ്ഥനായ ഒരു പൊലീസ് ഉദ്യോഗസ്ഥന്റെ ഭാഗത്തുനിന്നുണ്ടായ ഈ പ്രവൃത്തി പൊതുസമൂഹത്തിൽ സേനയുടെ പ്രതിച്ഛായയ്ക്കും അന്തസ്സിനും വലിയ കളങ്കമുണ്ടാക്കിയെന്ന് കമ്മീഷണറുടെ സസ്പെൻഷൻ ഉത്തരവിൽ വ്യക്തമാക്കുന്നു. സേനാംഗങ്ങൾ സോഷ്യൽ മീഡിയയിൽ പെരുമാറ്റച്ചട്ടം പാലിക്കണമെന്ന നിർദ്ദേശം നിലനിൽക്കെയാണ് ഈ സംഭവം.
