ലക്‌നൗ: ജ്ഞാൻവാപി മന്ദിരത്തിൽ ഹിന്ദുക്കൾക്ക് ആരാധനയ്ക്കായി അനുമതി നൽകിയതിനെതിരായ ഹർജി തള്ളി ഹൈക്കോടതി. അൻജുമാൻ മസ്ജിദ് കമ്മിറ്റി നൽകിയ ഹർജിയാണ് അലഹബാദ് ഹൈക്കോടതി തള്ളിയത്. ഹിന്ദുക്കൾക്ക് വിചാരണ കോടതിയുടെ ഉത്തരവ് പ്രകാരമുള്ള പൂജകൾ തുടരാമെന്നും കോടതി അറിയിച്ചു.
വാരാണസി ജില്ലാ കോടതിയാണ് കോടതിയാണ് മന്ദിരത്തിൽ ആരാധന നടത്താൻ ഹിന്ദു വിഭാഗത്തിന് അനുമതി നൽകിയത്. ജസ്റ്റിസ് രോഹിത് രഞ്ജൻ അഗർവാളാണ് ഈ വിധി ശരിവച്ചത്. ഹിന്ദു വിഭാഗം നൽകിയ തെളിവുകൾ പരിഗണിച്ചുകൊണ്ടായിരുന്നു തീരുമാനം. തെളിവുകൾ പരിശോധിക്കുമ്പോൾ വിചാരണ കോടതിയുടെ ഉത്തരവിൽ ഇടപെടേണ്ട സാഹചര്യമുള്ളതായി കാണുന്നില്ലെന്ന് കോടതി വ്യക്തമാക്കി. ഇതിന് പിന്നാലെ ഹിന്ദുക്കൾക്ക് ആരാധന തുടരാമെന്നും കോടതി അറിയിക്കുകയായിരുന്നു.
കഴിഞ്ഞ മാസം 31 നായിരുന്നു വാരാണസി കോടതി മന്ദിരത്തിൽ ആരാധനയ്ക്കായി അനുമതി നൽകിയത്. പുരാവസ്തു വകുപ്പ് നടത്തിയ പരിശോധനയിൽ മന്ദിരം മുൻപ് ക്ഷേത്രമാണെന്ന് സ്ഥിരീകരിക്കുന്ന തെളിവുകൾ കണ്ടെത്തിയിരുന്നു. ഇതിന്റെ അടിസ്ഥാനത്തിൽ അനുമതി നൽകുകയായിരുന്നു. അന്ന് തന്നെ ഉത്തരവിനെതിരെ കമ്മിറ്റി സുപ്രീംകോടതിയെ സമീപിച്ചു. എന്നാൽ ഹർജി പരിഗണിക്കാൻ കഴിയില്ലെന്നും ഹൈക്കോടതിയെ സമീപിക്കണമെന്നും കോടതി മസ്ജിദ് കമ്മിറ്റി നിർദ്ദേശം നൽകുകയായിരുന്നു. ഇതേ തുടർന്നാണ് ഹൈക്കോടതിയിൽ ഹർജി നൽകിയത്.
Discussion about this post