ന്യൂഡൽഹി: ഐ ടി ഭീമൻ ഇൻഫോസിസ് സ്ഥാപകന്റെ ഭാര്യയും എഴുത്തുകാരിയും സാമൂഹ്യ പ്രവർത്തകയും ആയ സുധാ മൂർത്തിയെ രാജ്യസഭാംഗമായി നാമനിർദ്ദേശം ചെയ്ത് രാഷ്ട്രപതി ദ്രൗപതി മുർമു. സുധാ മൂർത്തിയുടെയും നാരായണ മൂർത്തിയുടെയും മകൾ ആയ അക്ഷതാ മൂർത്തിയെയാണ് ബ്രിട്ടീഷ് പ്രധാനമന്ത്രി ഋഷി സുനക് വിവാഹം കഴിച്ചിരിക്കുന്നത്. രാജ്യത്തെ അറിയപ്പെടുന്ന ജീവകാരുണ്യ പ്രവർത്തകയും, എഴുത്തുകാരിയും ആണ് സുധാ മൂർത്തി
അതേസമയം സുധാമൂർത്തിയെ രാജ്യസഭാംഗം ആയി നാമനിർദ്ദേശം ചെയ്ത രാഷ്ട്രപതിയുടെ തീരുമാനത്തിൽ സന്തോഷം പ്രകടിപ്പിച്ചു കൊണ്ട് പ്രധാനമന്ത്രി നരേന്ദ്ര മോദി രംഗത്ത് വന്നു.
“ഇന്ത്യൻ രാഷ്ട്രപതി സുധാ മൂർത്തി ജിയെ രാജ്യസഭയിലേക്ക് നാമനിർദ്ദേശം ചെയ്തതിൽ ഞാൻ സന്തുഷ്ടനാണ്. സാമൂഹിക പ്രവർത്തനം, ജീവകാരുണ്യ പ്രവർത്തനങ്ങൾ, വിദ്യാഭ്യാസം എന്നിവയുൾപ്പെടെ വിവിധ മേഖലകളിൽ സുധാജിയുടെ സംഭാവനകൾ വലുതും പ്രചോദനാത്മകവുമാണ്. രാജ്യസഭയിലെ അവരുടെ സാന്നിധ്യം ഞങ്ങളുടെ ‘നാരി ശക്തി’ പദ്ധതിയുടെ ശക്തമായ തെളിവാണ്., നമ്മുടെ രാജ്യത്തിൻ്റെ ഭാഗധേയം രൂപപ്പെടുത്തുന്നതിൽ സ്ത്രീകളുടെ ശക്തിയും കഴിവും എടുത്തുകാട്ടുന്നതാണ് സുധാ മൂർത്തിയുടെ പ്രവർത്തനങ്ങൾ. അവർക്ക് ഫലപ്രദമായ പാർലമെൻ്ററി കാലയളവ് ആശംസിക്കുന്നു,” പ്രധാനമന്ത്രി മോദി സമൂഹ മാദ്ധ്യമമായ എക്സിൽ പറഞ്ഞു.
