നടൻ ടൊവിനോ തോമസിനോടൊപ്പം നിൽക്കുന്ന തൃശ്ശൂരിലെ എൽഡിഎഫ് സ്ഥാനാർത്ഥി വി എസ് സുനിൽകുമാറിന്റെ ചിത്രം കഴിഞ്ഞ ദിവസങ്ങളിൽ സമൂഹ മാദ്ധ്യമങ്ങളിൽ ശ്രദ്ധ നേടിയിരുന്നു. എന്നാൽ ഇപ്പോൾ ഈ വിഷയത്തിൽ ടൊവിനോ തന്നെ രംഗത്ത് എത്തിയിരിക്കുകയാണ്. തന്റെ അറിവോടെയോ സമ്മതത്തോടെയോ അല്ല ഇത്തരത്തിൽ ആരെങ്കിലും തന്റെ ചിത്രം ഉപയോഗിക്കുന്നത് എന്നാണ് ടൊവിനോ വ്യക്തമാക്കിയത്.
തിരഞ്ഞെടുപ്പ് പ്രചാരണത്തിന്റെ ഭാഗമായി തന്റെ ചിത്രം ഉപയോഗിക്കുന്നത് നിയമവിരുദ്ധമാണെന്നും ടൊവിനോ തോമസ് അറിയിച്ചു. എല്ലാ ലോക്സഭാ സ്ഥാനാർത്ഥികൾക്കും ആശംസകൾ അറിയിച്ചുകൊണ്ട് സമൂഹമാദ്ധ്യമങ്ങളിൽ പങ്കുവെച്ച പോസ്റ്റിലൂടെയാണ് ടൊവിനോ ഇക്കാര്യം വ്യക്തമാക്കിയത്.
ഇന്ത്യയിലെ തിരഞ്ഞെടുപ്പ് കമ്മീഷന്റെ ‘ സിസ്റ്റമിക് വോട്ടേഴ്സ് എജുക്കേഷൻ ആൻഡ് ഇലക്ടറൽ പാർട്ടിസിപ്പേഷൻ’ വിഭാഗത്തിലെ കേരളത്തിലെ അംബാസഡർ ആണ് ടൊവിനോ തോമസ്. അതിനാൽ തന്നെ ടൊവിനോയുടെ ചിത്രമോ ടൊവിനോയോടൊപ്പം ഉള്ള സ്ഥാനാർത്ഥിയുടെ ചിത്രമോ തിരഞ്ഞെടുപ്പ് പ്രചാരണത്തിന്റെ ഭാഗമായി ഉപയോഗിക്കുന്നത് നിയമവിരുദ്ധമാണ്.
അത്തരത്തിൽ ആരെങ്കിലും തന്റെ ചിത്രങ്ങൾ ഉപയോഗിക്കുന്നുണ്ടെങ്കിൽ അത് തന്റെ അറിവോടെയോ സമ്മതത്തോടെയോ അല്ല എന്ന് വ്യക്തമാക്കാൻ ആഗ്രഹിക്കുന്നുവെന്ന് ടൊവിനോ തോമസ് തന്റെ സമൂഹമാദ്ധ്യമ പോസ്റ്റിൽ വ്യക്തമാക്കി. ഏവർക്കും നിഷ്പക്ഷവും നീതിയുക്തവുമായ ഒരു തിരഞ്ഞെടുപ്പ് ആശംസിക്കുന്നതായും ടൊവിനോ അറിയിച്ചു.
Discussion about this post