ക്രിസ്മസ് രാവുകള്ക്ക് ഇനി ദിവസങ്ങൾ മാത്രമാണ് ബാക്കി. പല വീടുകളിലും നക്ഷത്രം തൂക്കിയും വൈന് ഇട്ടും ക്രിസ്മസിനായി ഒരുക്കങ്ങള് തുടങ്ങി കഴിഞ്ഞു. ക്രിസ്മസ് ആഘോഷത്തില് ഒഴിച്ചുകൂടാനാവാത്ത ഒന്നാണ് ക്രിസ്മസ് ട്രീ.
ക്രിസ്മസിനോട് അടുക്കുമ്പോള് പലരും പല തരത്തിലും വലുപ്പത്തിലും വിലയിലും ഒക്കെയുള്ള ക്രിസ്മസ് ട്രീ ഒരുക്കാറുണ്ട്… എന്നാൽ, ഇപ്പോഴിതാ വളരെ വിശേഷപ്പെട്ട ഒരു ക്രിസ്മസ് ട്രീയാണ് വാർത്തയാവുന്നത്. ലോകത്തിലെ ഏറ്റവും വിലയേറിയ ക്രിസ്മസ് ട്രീകളിലൊന്നായ ഇത് ജർമ്മനിയിലാണ് അനാച്ഛാദനം ചെയ്തിരിക്കുന്നത്.
63 കിലോഗ്രാം ഭാരമുള്ള ഈ ക്രിസ്മസ് ട്രീക്ക് 5.5 മില്യൺ ഡോളർ അതായത് ഏകദേശം 47 കോടി രൂപയാണ് വില കണക്കാക്കുന്നത്. 2,024 വിയന്ന ഫില്ഹാര്മോണിക് ഗോൾഡ് കോയിനുകൾ ഉപയോഗിച്ചാണത്രെ ഈ ക്രിസ്മസ് ട്രീ നിര്മിച്ചിരിക്കുന്നത്.
മ്യൂണിച്ച് ആസ്ഥാനമായി പ്രവര്ത്തിക്കുന്ന സ്വര്ണ വ്യാപാരികളായ പ്രോ ഔറമാണ് ഈ വിശേഷപ്പെട്ട ക്രിസ്മസ് ട്രീ നിർമ്മിച്ചിരിക്കുന്നത്. എത്ര തലമുറകൾ കഴിഞ്ഞാലും ഈ സ്വര്ണം അതിന്റെ മൂല്യം നിലനിര്ത്തുമെന്നാണ് പ്രോ ഔറം വക്താവായ ബെഞ്ചമിന് സമ്മ പറയുന്നത്. സ്വർണത്തിന്റെ കാലാതീതമായ പ്രാധാന്യത്തെ ഈ ക്രിസ്മസ് ട്രീ ഉയർത്തിക്കാട്ടുന്നുവെന്നും അദ്ദേഹം പറഞ്ഞു.
എന്നാൽ, ഈ ക്രിസ്മസ് ട്രീ വിൽക്കാൻ വേണ്ടി നിർമ്മിച്ചതല്ല. പ്രോ ഔറത്തിന്റെ 35 -ാം വാർഷികത്തിന്റെ ഭാഗമായിട്ടാണത്രെ ഇത് തയ്യാറാക്കിയിരിക്കുന്നത്.
Discussion about this post