ന്യൂഡൽഹി: ബംഗ്ലാദേശിൽ ന്യൂനപക്ഷമായ ഹിന്ദുക്കൾക്കെതിരെ ആക്രമണങ്ങൾ തുടരുന്ന പശ്ചാത്തലത്തിൽ ഡൽഹിയിലെ സ്കൂളുകൾക്ക് കൃത്യമായ നിർദ്ദേശം നൽകി വിദ്യാഭ്യാസ വകുപ്പ്. അനധികൃതമായി ഇന്ത്യയിലേക്ക് കുടിയേറിയ ബംഗ്ലാദേശികൾ സ്കൂളുകളിൽ പ്രവേശിപ്പിക്കരുത് എന്ന നിർദ്ദേശമാണ് വിദ്യാഭ്യാസ ഡയറക്ടറേറ്റ് (DoE) സ്കൂളുകൾക്ക് നൽകിയിരിക്കുന്നത്.
പ്രവേശനം നേടുന്ന സമയത്ത് രേഖകളുടെ കർശനമായ സ്ഥിരീകരണം ഉറപ്പുവരുത്തണം. ഇതിലൂടെ ‘അനധികൃത ബംഗ്ലാദേശി കുടിയേറ്റക്കാരുടെ’ സ്കൂൾ പ്രവേശനം തടയണം. വിദ്യാഭ്യാസ ഡയറക്ടറേറ്റ് തിങ്കളാഴ്ച ഡൽഹിയിലെ സ്കൂളുകളോട് ആവശ്യപ്പെട്ടു.
എല്ലാ സർക്കാർ, സർക്കാർ-എയ്ഡഡ്, അൺ എയ്ഡഡ് അംഗീകൃത സ്വകാര്യ സ്‌കൂളുകളുടെയും മേധാവികൾക്ക് നിർദ്ദേശം അയച്ചു. രേഖകളിൽ എന്തെങ്കിലും സംശയമുണ്ടെങ്കിൽ ലോക്കൽ പോലീസിനെയും റവന്യൂ അതോറിറ്റിയെയും അറിയിക്കാനും നിർദ്ദേശമുണ്ട്.
കുടിയേറ്റക്കാരുടെ കുട്ടികളെ എൻറോൾ ചെയ്യുമ്പോൾ ആവശ്യമായ എല്ലാ ഡോക്യുമെൻ്റേഷനുകളും പരിശോധിക്കുന്നതിനും കൈകാര്യം ചെയ്യുന്നതിനും സൂക്ഷ്മമായ ഒരു പ്രക്രിയ പിന്തുടരുന്നുവെന്ന് ഉറപ്പാക്കാൻ വിദ്യാഭ്യാസ ഡയറക്ടറേറ്റ് സ്കൂൾ മേധാവികൾക്ക് നിർദ്ദേശം നൽകി. ജില്ലാ വിദ്യാഭ്യാസ ഡയറക്ടറേറ്റിന് (ജില്ലകൾ/മേഖലകൾ) അത്തരം എല്ലാ കേസുകളുടെയും പ്രതിവാര റിപ്പോർട്ടുകൾ സ്കൂൾ ബ്രാഞ്ച് ആസ്ഥാനത്തും വിദ്യാഭ്യാസ ഡയറക്ടറേറ്റിലും സമർപ്പിക്കാൻ നിർദ്ദേശിച്ചു.
