അബുദാബി : യുഎഇ ലക്ഷ്യമിട്ട് വീണ്ടും ആക്രമണങ്ങളുമായി ഇറാൻ. ഇന്ന് ഇതുവരെ ഇറാൻ 7 മിസൈലുകളും 131 ഡ്രോണുകളും യുഎഇയിലേക്ക് വിക്ഷേപിച്ചു. ഇറാൻ ഏഴ് ബാലിസ്റ്റിക് മിസൈലുകൾ തങ്ങൾക്ക് നേരെ തൊടുത്തുവിട്ടതായും അതിൽ ഒന്ന് രാജ്യത്തിനുള്ളിൽ പതിച്ചതായും യുഎഇ പ്രതിരോധ മന്ത്രാലയം ഔദ്യോഗികമായി അറിയിച്ചു.
സംഘർഷം ആരംഭിച്ചതിനു ശേഷം ഇറാൻ ഏറ്റവും കൂടുതൽ മിസൈലുകൾ വിക്ഷേപിച്ചത് യുഎഇ ലക്ഷ്യമിട്ടാണ്. ഇതുവരെ ആകെയായി ഇറാൻ യുഎഇയിലേക്ക് 196 ബാലിസ്റ്റിക് മിസൈലുകൾ വിക്ഷേപിച്ചു. അതിൽ 181 എണ്ണം തകർക്കപ്പെട്ടു. 13 എണ്ണം കടലിൽ വീണു. രണ്ടെണ്ണം രാജ്യത്ത് പതിച്ചു. കൂടാതെ ഇറാൻ വിക്ഷേപിച്ച 1,072 ഡ്രോണുകളിൽ 1,001 എണ്ണം യുഎഇ തടഞ്ഞു. ആക്രമണങ്ങളിൽ മൂന്ന് പേർ മരിച്ചു. ഒരു പാകിസ്താനി, ഒരു നേപ്പാളി, ഒരു ബംഗ്ലാദേശി എന്നിവരാണ് മരിച്ചത്. തൊണ്ണൂറ്റി നാല് പേർക്ക് പരിക്കേറ്റുവെന്നും യുഎഇ പ്രതിരോധ മന്ത്രാലയം പുറത്തുവിട്ട റിപ്പോർട്ടിൽ വ്യക്തമാക്കുന്നു.
