തിരുവനന്തപുരം: ഇന്ത്യയുടെ വ്യാവസായിക ഭൂപടത്തിൽ ചരിത്രപരമായ മറ്റൊരു നാഴികക്കല്ല് കൂടി പിന്നിട്ട് വിഴിഞ്ഞം അന്താരാഷ്ട്ര തുറമുഖം. സമ്പൂർണ ചരക്ക് നീക്കത്തിലേക്ക് (EXIM Operations) കടന്നതിന് ശേഷമുള്ള ആദ്യ ഇറക്കുമതി (Import) കണ്ടെയ്‌നറുമായി കപ്പൽ വിഴിഞ്ഞം തീരത്തെത്തി. ചൈനയിലെ നിങ്‌ബോ തുറമുഖത്തുനിന്ന് പുറപ്പെട്ട പ്രമുഖ ഷിപ്പിങ് ലൈനായ എം.എസ്.സി-യുടെ ‘എം.എസ്.സി സബ്രീന-3’ (MSC Sabrina III) എന്ന ഭീമൻ കപ്പലിലാണ് ചരിത്രപ്രധാനമായ ഈ ചരക്കെത്തിയത്.
തിരുവനന്തപുരം ആസ്ഥാനമായി പ്രവർത്തിക്കുന്ന പ്രമുഖ സംരംഭമായ ഓൾടെയർ ഗ്രൂപ്പിനായി (Altair Group) നഗരത്തിലെ തന്നെ സ്റ്റാർട്ടപ്പായ ബി.എസ്.ജി. ലോജിസ്റ്റിക്‌സ് ആൻഡ് ഷിപ്പ് ചാൻഡ്‌ലേഴ്‌സ് പ്രൈവറ്റ് ലിമിറ്റഡാണ് (BSG Logistics and Ship Chandlers Pvt Ltd) ഈ കണ്ടെയ്‌നർ ബുക്ക് ചെയ്തത്. നിർമാണ മേഖലയിൽ പരമ്പരാഗത പ്ലൈവുഡിന് പകരമായി ഉപയോഗിക്കുന്ന ഉയർന്ന ഗുണനിലവാരമുള്ള ‘എൻജിനിയേർഡ് ബിൽഡിങ് ബോർഡുകളാ’ണ് ആദ്യ കണ്ടെയ്‌നറിലുള്ളത്. തുറമുഖത്ത് എത്തിച്ചേർന്ന ആദ്യ ഇറക്കുമതി കണ്ടെയ്‌നറിന്റെ ഫ്ലാഗ് ഓഫ് ഇന്റർനാഷണൽ സീപോർട്ട് ലിമിറ്റഡ് മാനേജിങ് ഡയറക്ടർ ജെറോമിക് ജോർജ് നിർവഹിച്ചു.
ഇതുവരെ മറ്റ് വിദേശ തുറമുഖങ്ങളിലോ അയൽ സംസ്ഥാനങ്ങളിലെ മറ്റ് പ്രധാന പോർട്ടുകളിലോ ചരക്കുകൾ ഇറക്കി റോഡ്-റെയിൽ മാർഗങ്ങൾ വഴി കേരളത്തിലേക്ക് എത്തിക്കേണ്ടിയിരുന്ന അവസ്ഥയ്ക്കാണ് ഇതോടെ വിരാമമാകുന്നത്.കൊച്ചിയെയോ തൂത്തുക്കുടിയെയോ ആശ്രയിക്കാതെ ചരക്കുകൾ നേരിട്ട് തിരുവനന്തപുരത്ത് എത്തുന്നതോടെ സംസ്ഥാനത്തെ വ്യാപാരികൾക്കും വ്യവസായികൾക്കും സമയത്തിലും ചരക്കുകൂലിയിലും വൻ തുക ലാഭിക്കാൻ സാധിക്കും.
ലോകത്തിലെ തന്നെ പ്രധാന അന്താരാഷ്ട്ര കപ്പൽ പാതയോട് തൊട്ടടുത്തു കിടക്കുന്ന വിഴിഞ്ഞത്ത് നേരിട്ട് ഇറക്കുമതി സാധ്യമായതോടെ ലോജിസ്റ്റിക്‌സ്, വെയർഹൗസിങ്, കസ്റ്റംസ് ബ്രോക്കറേജ് തുടങ്ങിയ മേഖലകളിൽ വലിയ തോതിൽ പുതിയ തൊഴിലവസരങ്ങൾ സൃഷ്ടിക്കപ്പെടുമെന്നാണ് വിലയിരുത്തൽ. ട്രാൻസ്ഷിപ്പ്‌മെന്റ് പോർട്ട് എന്ന നിലയിൽ വലിയ വിജയം കൈവരിച്ച വിഴിഞ്ഞം, നേരിട്ടുള്ള ചരക്ക് ഇറക്കുമതി കൂടി ആരംഭിച്ചതോടെ ആഗോള തലത്തിലെ പ്രമുഖ ചരക്ക് കൈമാറ്റ കേന്ദ്രമായി അതിവേഗം മാറുകയാണ്.
