കൽപ്പറ്റ: വയനാട്ടിൽ എസ്എഫ്ഐ ഭാരവാഹികൾ തമ്മിലുള്ള ചേരിതിരിവും വിഭാഗീയതയും തെരുവിലേക്ക്.സംഘടനയിലെ മുതിർന്ന നേതാക്കൾ തന്നെ ക്രൂരമായി മർദ്ദിക്കുകയും വധഭീഷണി മുഴക്കുകയും ചെയ്തെന്ന ഞെട്ടിക്കുന്ന വെളിപ്പെടുത്തലുമായി എസ്എഫ്ഐ ജില്ലാ ജോയിന്റ് സെക്രട്ടറി സായന്ത് രംഗത്തെത്തി. ഫേസ്ബുക്ക് വീഡിയോയിലൂടെയും പോസ്റ്റിലൂടെയുമാണ് സംഘടനാ നേതൃത്വത്തിനെതിരെ ഗുരുതരമായ ആരോപണങ്ങൾ സായന്ത് പരസ്യപ്പെടുത്തിയത്.
പുൽപ്പള്ളിയിലെ സിപിഎം പാർട്ടി ഓഫീസിൽ വെച്ച് എസ്എഫ്ഐ ജില്ലാ സെക്രട്ടറി ആദർശും കേന്ദ്ര കമ്മിറ്റി അംഗവും ചേർന്ന് തന്നെ ക്രൂരമായി മർദ്ദിച്ചെന്നാണ് സായന്തിന്റെ വെളിപ്പെടുത്തൽ. പൂക്കോട് വെറ്ററിനറി സർവ്വകലാശാലയിൽ ദാരുണമായി കൊല്ലപ്പെട്ട സിദ്ധാർത്ഥന്റെ അനുഭവം ഉണ്ടാകുമെന്ന് ഭീഷണിപ്പെടുത്തിയതായും സായന്ത് ആരോപിക്കുന്നു.സംഭവത്തിൽ സംഘടനയിലെ ഉയർന്ന നേതൃത്വത്തിന് പരാതി നൽകി 19 ദിവസങ്ങൾ പിന്നിട്ടിട്ടും യാതൊരുവിധ നടപടിയും ഉണ്ടാകാത്ത സാഹചര്യത്തിലാണ് കാര്യങ്ങൾ പരസ്യമായി തുറന്നുപറയാൻ നിർബന്ധിതനായതെന്ന് സായന്ത് ഫേസ്ബുക്കിൽ കുറിച്ചു.
സംഘടനയിലുള്ള എല്ലാ പ്രതീക്ഷയും നഷ്ടപ്പെട്ടെന്നും നീതി ലഭിക്കാൻ വേണ്ടിയാണ് ആരോപണങ്ങൾ പരസ്യമാക്കുന്നതെന്നും അദ്ദേഹം വ്യക്തമാക്കി. ജില്ലയിലെ ഗ്രൂപ്പ് പോരിന്റെയും നേതാക്കൾ തമ്മിലുള്ള കുടിപ്പകയുടെയും ഭാഗമായാണ് മർദ്ദനമെന്നാണ് സൂചന. നേരത്തെ തന്നെ ഈ മർദ്ദന വിവരങ്ങൾ പുറത്തുവന്നിരുന്നെങ്കിലും ഇരയായ സായന്ത് തന്നെ നേരിട്ട് ഫേസ്ബുക്കിലൂടെ രംഗത്തുവന്നത് എസ്എഫ്ഐ നേതൃത്വത്തെയും സിപിഎം ജില്ലാ നേതൃത്വത്തെയും പ്രതിരോധത്തിലാക്കിയിട്ടുണ്ട്. സ്വന്തം ഭാരവാഹിക്കെതിരെ പാർട്ടി ഓഫീസിനുള്ളിൽ വെച്ച് വധഭീഷണിയും മർദ്ദനവും ഉയർന്ന സംഭവത്തിൽ പാർട്ടി എന്ത് നിലപാട് സ്വീകരിക്കുമെന്നാണ് ഇനി കണ്ടറിയേണ്ടത്.
