തിരുവനന്തപുരം: സംസ്ഥാനത്ത് സ്വർണവിലയിൽ വൻ ഇടിവ് തുടരുന്നു. ശനിയാഴ്ച രേഖപ്പെടുത്തിയത് കഴിഞ്ഞ ഏഴു മാസത്തിനിടയിലെ ഏറ്റവും കുറഞ്ഞ നിരക്കാണ്. രണ്ടു ദിവസം കൊണ്ട് പവന് 3,720 രൂപയുടെ കൂപ്പുകുത്തലാണ് വിപണിയിലുണ്ടായത്. ശനിയാഴ്ച മാത്രം പവന് 2,480 രൂപ കുറഞ്ഞ് 1,01,840 രൂപയിലായിരുന്നു വ്യാപാരം നടന്നത്.ഗ്രാമിന് 310 രൂപ ഇടിഞ്ഞ് 12,730 രൂപയിലുമെത്തി.
വില കുറയുന്ന പ്രവണത തുടരുകയാണെങ്കിൽ പവൻവില ഉടൻ തന്നെ ഒരു ലക്ഷം രൂപയ്ക്ക് താഴേക്ക് എത്തിയേക്കുമെന്ന പ്രതീക്ഷയിലാണ് ഉപഭോക്താക്കൾ. ഇനി കേവലം 1,481 രൂപ കൂടി കുറഞ്ഞാൽ പവൻവില ഒരു ലക്ഷത്തിന് താഴെയെത്തും. ഇതിനു മുൻപ് 2026 മാർച്ച് 23-നാണ് പവൻവില ലക്ഷത്തിന് താഴെ (99,480 രൂപ) എത്തിയത്. എന്നാൽ അന്നേദിവസം തന്നെ വില തിരിച്ചുകയറി 1,05,080 രൂപയിലാണ് വ്യാപാരം അവസാനിപ്പിച്ചിരുന്നത്.
അന്താരാഷ്ട്ര വിപണിയിലുണ്ടായ പെട്ടെന്നുള്ള വിലയിടിവാണ് ആഭ്യന്തര വിപണിയിലും പ്രതിഫലിക്കുന്നത്.അമേരിക്കൻ ഡോളർ ശക്തമായതും ആഗോള സാമ്പത്തിക രംഗത്തെ മാറ്റങ്ങളുമാണ് സ്വർണത്തിന് തിരിച്ചടിയായത്.വിവാഹ സീസൺ അടുത്തുവരുന്ന പശ്ചാത്തലത്തിൽ സ്വർണവില താഴേക്ക് ഇറങ്ങുന്നത് സാധാരണക്കാർക്കും ആഭരണപ്രേമികൾക്കും വലിയ ആശ്വാസമാണ് നൽകുന്നത്. വരും ദിവസങ്ങളിലും ഈ ഇടിവ് തുടരുമോ എന്നാണ് വിപണി ഉറ്റുനോക്കുന്നത്.
