ദുബായ്: ഇന്ത്യൻ പ്രീമിയർ ലീഗിൽ റോയൽ ചലഞ്ചേഴ്സ് ബാംഗ്ലൂരിന് വിജയത്തുടക്കം. സൺറൈസേഴ്സ് ഹൈദരാബാദിനെ 10 റൺസിനാണ് കോലിപ്പട പരാജയപ്പെടുത്തിയത്. അർദ്ധസെഞ്ചുറി നേടിയ മലയാളി താരം ദേവദത്ത് പടിക്കലും എ ബി ഡിവില്ലിയേഴ്സും മൂന്ന് വിക്കറ്റ് വീഴ്ത്തിയ സ്പിന്നർ ചാഹലും ബാംഗ്ലൂരിന്റെ വിജയം എളുപ്പമാക്കി. ബാംഗ്ലൂർ ഉയർത്തിയ 164 റൺസ് വിജയ ലക്ഷ്യം പിന്തുടർന്ന ഹൈദരാബാദ് 19.4 ഓവറിൽ 153 റൺസിന് പുറത്തായി.
ടോസ് നേടിയ സൺറൈസേഴ്സ് നായകൻ ഡേവിഡ് വാർണർ ബാംഗ്ലൂരിനെ ബാറ്റിംഗിനയച്ചു. ഓപ്പണർമാരായ ദേവദത്ത് പടിക്കലും ആരോൺ ഫിഞ്ചും ചേർന്ന് 90 റൺസിന്റെ കൂട്ടുകെട്ട് പടുത്തുയർത്തി. 51 റൺസ് നേടിയ ഡിവില്ലിയേഴ്സും റൺ നിരക്ക് താഴാതെ കാത്തു. നായകൻ വിരാട് കോഹ്ലി 14 റൺസിന് പുറത്തായി.
മറുപടി ബാറ്റിംഗിൽ ഹൈദരാബാദിന് വേണ്ടി ജോണി ബെയർസ്റ്റോ 61 റൺസ് നേടി. മനീഷ് പാണ്ഡെ 34 റൺസുമായി പിടിച്ചു നിന്നുവെങ്കിലും മറ്റ് ബാറ്റ്സ്മാന്മാർ നിരാശപ്പെടുത്തി. ബാംഗ്ലൂരിന് വേണ്ടി ചാഹൽ 4 ഓവറിൽ 18 റൺസ് മാത്രം വിട്ടുകൊടുത്ത് 3 വിക്കറ്റ് വീഴ്ത്തി. നവ്ദീപ് സൈനിയും ശിവം ദുബെയും രണ്ട് വിക്കറ്റ് വീതം വീഴ്ത്തി. ചാഹലാണ് മാൻ ഓഫ് ദ് മാച്ച്
സ്കോർ
റോയൽ ചലഞ്ചേഴ്സ് ബാംഗ്ലൂർ: 163/5 (20)
സൺറൈസേഴ്സ് ഹൈദരാബാദ്: 153/10 (19.4)
