1000 പോയിന്‍റില്‍ നിന്ന് 50,000ത്തിലേക്ക്. സെന്‍സെക്സിന്‍റെ 30 വര്‍ഷത്തെ യാത്ര ഇങ്ങനെയാണ്. വ്യാഴാഴ്ചത്തെ വ്യാപാരത്തില്‍ 250 പോയിന്‍റ് മുന്നേറിയതോടെയാണ് 50,000 എന്ന നേട്ടത്തിലേക്ക് സെന്‍സെക്സ് എത്തിയത്. കഴിഞ്ഞ മാര്‍ച്ചില്‍ 25,638 പോയിന്‍റില്‍ വ്യാപാരം നടത്തിയ സൂചികയാണ് മാസങ്ങള്‍ക്കള്‍ക്കകം ചരിത്രേനട്ടം കുറിച്ചത്. 32 വ്യാപാര സെഷനുകളില്‍ സെന്‍സെക്സിന്‍റെ മൂല്യം 5000 പോയിന്‍റ് ഉയര്‍ന്നു.
1990 കളില്‍ 1000 പോയിന്‍റിലായിരുന്നു സെന്‍സെക്സിന്‍റെ വ്യാപാരം. ഇതിനിടെ ക്രമാനുഗതമായ ഉയര്‍ച്ച രേഖപ്പെടുത്തിയ ഓഹരി വിപണി ചില ഘട്ടങ്ങളില്‍ പ്രതിസന്ധിയേയും അഭിമുഖീകരിച്ചു. അധികാരമാറ്റങ്ങളും ഉദാര സാമ്പത്തിക നയങ്ങളും സാങ്കേതിക മേഖലയിലെ വിപ്ലവുമെല്ലാം സെന്‍സെക്സിന്‍റെ ഉയര്‍ച്ചയെ സ്വാധീനിച്ചു.
എന്നാല്‍, ഭീകരാക്രമണങ്ങളും തട്ടിപ്പുകളും സര്‍ക്കാറിന്‍റെ നയങ്ങളും വിപണിയുടെ തിരിച്ചടിക്കും കാരണമായി.50,000 പോയിന്‍റിലേക്ക് എത്തുന്ന വേളയില്‍ സെന്‍സെക്സിന്‍റെ ജൈത്രയാത്രയെ കുറിച്ചുള്ള ട്വീറ്റുമായി ബി.എസ്.ഇ തന്നെ രംഗത്തെത്തിയിരിക്കുകയാണ്.വിപണിയുടെ തുടക്കത്തില്‍ 223 പോയന്റ് ഉയര്‍ന്നതോടെയാണ് സെന്‍സെക്സ് 50,000 എന്ന നിലവാരം മറികടന്നത്.
ദേശീയ ഓഹരി സൂചികയായ നിഫ്റ്റിയിലും മുന്നേറ്റം ദൃശ്യമാണ്. 14700 എന്ന നിലവാരത്തിലാണ് നിഫ്റ്റിയില്‍ വ്യാപാരം തുടരുന്നത്. റിലയന്‍സ് ഇന്‍റസ്ട്രീസും ഇന്‍ഫോസിസുമാണ് വന്‍ നേട്ടം കൊയ്തു. അദാനി പോര്‍ട്സ്, എച്ച്‌ഡിഎഫ്‍സി, ഗെയില്‍ തുടങ്ങിയ കമ്പനികള്‍ക്ക് നഷ്ടം നേരിട്ടു.
