20 വര്‍ഷം മുമ്പ് മലയാള സിനിമയിലേക്കുള്ള അരങ്ങേറ്റ ചിത്രത്തിന്റെ ഓര്‍മ പങ്കുവെച്ച് നടി ഭാവന. കമല്‍ സംവിധാനം ചെയ്ത നമ്മള്‍ എന്ന ചിത്രത്തിലൂടെയായിരുന്നു ഭാവന മലയാള ചലച്ചിത്ര ലോകത്തിന്റെ ഭാഗമായത്. ആദ്യ സിനിമയിലെ മികച്ച അഭിനയം നടിക്കെന്ന പോലെ സിനിമ ആസ്വാദകര്‍ക്കും ഏറെ പ്രിയപ്പെട്ടതായിയിരുന്നു.
ഇതിലും മികച്ച ഒരു അരങ്ങേറ്റം തനിക്ക് ലഭിക്കാനില്ല എന്ന് വ്യക്തമാക്കിക്കൊണ്ട് സെറ്റിലെത്തിയ ആദ്യ ദിവസത്തെ ചിത്രം ഇന്‍സ്റ്റഗ്രാമിലൂടെയാണ് നടി പങ്കുവെച്ചിരിക്കുന്നത്. തൃശൂര്‍ ഭാഷ സംസാരിക്കുന്ന ചേരിനിവാസിയായ പരിമളം എന്ന പെണ്‍കുട്ടിയുടെ കഥാപാത്രമായിരുന്നു ചിത്രത്തില്‍ ഭാവനയുടേത്. ” മേക്കപ്പ് കഴിഞ്ഞ ശേഷം ദേഷ്യം കൊണ്ട് എന്റെ കണ്ണ് ചുവന്നത് എനിക്കോര്‍മ്മയുണ്ട്. ആരും എന്നെ തിരിച്ചറിയില്ലല്ലോ എന്നതായിരുന്നു സങ്കടം. പ്രായത്തിന്റെ അപക്വത കൊണ്ട് കഥാപാത്രത്തിന്റെ പ്രാധാന്യം അന്നെനിക്ക് മനസിലായില്ല. പക്ഷേ ഇന്നറിയാം എനിക്കിതിലും മികച്ച അരങ്ങേറ്റം കിട്ടാനില്ല” ഭാവന കുറിച്ചു. ഇന്നും യാത്ര തുടരുകയാണ് ,ജീവിതത്തിലേക്ക് തിരിഞ്ഞു നോക്കുമ്പോള്‍ എല്ലാവരോടും നന്ദിയുണ്ടെന്നും ഭാവന തന്റെ ഓര്‍മചിത്രത്തിനൊപ്പം എഴുതി.
20 വര്‍ഷം പഴക്കമുള്ള ചിത്രം ആരാധകര്‍ ആവേശത്തോടെ ഏറ്റെടുത്തിരിക്കുകയാണിപ്പോള്‍. ഭാവന പങ്കുവെച്ച ചിത്രത്തില്‍ സംവിധായകന്‍ കമലിനെ കൂടാതെ അന്ന് അദ്ദേഹത്തിന്റെ സഹായി ആയിരുന്ന ഷൈന്‍ ടോം ചാക്കോയേയും കാണാം. ഇന്ന് മികച്ച അഭിനയ ശേഷിയുള്ള നടന്‍മാരില്‍ എടുത്തു പറയാവുന്ന താരമായി മാറിയിരിക്കുന്ന ഷൈന്‍ ടോം ചാക്കോയുടെ പഴയകാല ചിത്രം എന്ന രീതിയിലും ഭാവനയുടെ ഓര്‍മചിത്രം ഹിറ്റാകുന്നുണ്ട്.
