നടുറോഡിൽ കാറിൽ നിന്ന് സ്റ്റീരിയോ മോഷ്ടിച്ച കള്ളനെ സിനിമാ സ്‌റ്റൈലിൽ പിടിച്ച് നടനും പോലീസ് ഉദ്യോഗസ്ഥനുമായ ജിബിൻ ഗോപിനാഥ്. മിന്നൽ മുരളി, കോൾഡ് കേസ് തുടങ്ങി ഒട്ടേറെ സിനിമകളിൽ അഭിനയിച്ച ജിബിൻ തിരുവനന്തപുരം പിഎംജിക്ക് സമീപത്തുള്ള കൺട്രോൾ റൂമിലെ ഉദ്യോഗസ്ഥനാണ്. കാറിൽ നിന്ന് സ്റ്റീരിയോ മോഷ്ടിച്ച കള്ളനെയാണ് ജിബിൻ പിടികൂടിയത്. തന്റെ 16 വർഷത്തെ സർവീസിനിടയിലെ ആദ്യത്തെ അനുഭവമെന്നാണ് ജിബിൻ ഫേസ്ബുക്കിൽ കുറിച്ചിരിക്കുന്നത്.
വീടിനുളളിലേക്ക് കാർ കയറാത്തതിനാൽ റോഡിന് സമീപം വീട്ടിലേക്കുള്ള വഴിയിലാണ് ഇത് പാർക്ക് ചെയ്യാറുള്ളത്. വൈകീട്ട് കുട്ടിക്ക് ചോക്ലേറ്റ് വാങ്ങാൻ പോയി മടങ്ങി വരുന്നതിനിടെ കാറിനടുത്ത് ഒരു ഓട്ടോറിക്ഷ നിർത്തിയിട്ടിരിക്കുന്നത് കണ്ടു. സംശയത്തോടെ നോക്കിയപ്പോൾ കാറിന്റെ ഡ്രൈവിംഗ് സീറ്റിൽ ഒരാൾ ഇരിക്കുന്നു. നിമിഷ നേരം കൊണ്ട് അയാൾ കാറിന്റെ ഓഡിയോ വീഡിയോ മോണിറ്റർ സിസ്റ്റം എല്ലാം കൈക്കലാക്കി തന്നെ നോക്കി ചിരിച്ചു.
എന്താ ഇവിടെ പരിപാടി എന്ന് ചോദിച്ചപ്പോൾ നൈസർഗികമായി ഒന്ന് ചിരിച്ചു. പിന്നെ ‘സാറെ ഒരബദ്ധം പറ്റിയതാണ്. ക്ഷമിക്കണം, ‘എന്ന് പറഞ്ഞു. മനസലിവ് തോന്നിയെങ്കിലും കോളറിന് പിടിച്ച് ആളെക്കൂട്ടി, പിന്നെ പോലീസിൽ വിവരം അറിയിച്ചു. മ്യൂസിയം സ്‌റ്റേഷനിൽ അയാൾക്കെതിരെ കേസെടുത്തിട്ടുണ്ട്. അങ്ങനെ സർവീസിലിരിക്കെ സ്വന്തം വാഹനത്തിലെ മോഷണം കണ്ടുപിടിച്ചു ആ പാപഭാരം താനിന്നു കഴുകി കളഞ്ഞു എന്നും ജിബിൻ ഫേസ്ബുക്കിൽ കുറിച്ചു.
ഫേസ്ബുക്ക് പോസ്റ്റിൻറെ പൂർണരൂപം-
ഇന്നൊരു സംഭവം ഉണ്ടായി.എന്റെ 16 വർഷത്തെ police ജീവിതത്തിൽ ഇതുവരെ ഒരു മോഷ്ടാവിനെ എനിക്ക് പിടിക്കാനുള്ള അവസരം ഉണ്ടായിട്ടില്ല.ഇനി കഥയിലേക്ക്,
വൈകിട്ട് 6.20 മണിയോടെ ന്റെ ചെക്കന്റെ chocolate കൊതി നിർബന്ധം കാരണം, അത് വാങ്ങാൻ two വീലറിൽ പുറത്തേക്കിറങ്ങിയതാണ്. വീട്ടിലേക്ക് കയറുന്നതിന്റെ അരികിൽ കുറച്ച് അടുത്തായാണ് എന്റെ car park ചെയ്തിരുന്നത്..
ചെറിയ gate അടഞ്ഞു കിടന്നതിനാൽ തുറക്കാൻ ചെന്ന ഞാൻ, car നോട്‌ ചേർന്ന് കാറിനു road ലേക്ക് ഇറങ്ങാൻ പറ്റാതെ ഒരു auto park ചെയ്തേക്കുന്നത് കണ്ട്,അടുത്തൊന്നുമില്ലാത്ത അതിന്റെ driver നെ മനസ്സിൽ തെറി പറഞ്ഞു ചെറിയ gate open ആക്കി തിരിഞ്ഞ ഞാൻ, എന്തോ ഒരു അസ്വാഭാവികത feel ചെയ്തിട്ട് കാറിലേക്ക് നോക്കി.ഒരു നിമിഷം സംശയിച്ചു എന്റെ car അല്ലെയെന്നു.കാരണം driving seat ൽ വേറൊരാൾ അതിനകത്തിരിപ്പുണ്ട്.അപ്പൊ അതിനൊരു തീരുമാനം ആവണമല്ലോ എന്ന് കരുതി അയാൾ പുറത്തിറങ്ങാൻ wait ചെയ്തു.
ഒരു മിനിറ്റിൽ അദ്ദേഹം car ലേ audio video മോണിറ്റർ system എല്ലാം കൈയിൽ പിടിച്ചു വളരെ നൈസർഗികമായ ഒരു ചിരിയോടെ എന്നെ നോക്കി.എന്താ ഇവിടെ പരിപാടി എന്ന ചോദ്യത്തിന്, ഏയ്‌ ഒന്നുല്ല എന്ന് നിഷ്കളങ്കമായി മറുപടി തന്നു.കൈയിൽ എന്താണ് എന്ന് ചോദിച്ചപ്പോ എനിക്ക് മനസ്സിലാകാത്തത് കൊണ്ടാണെന്നു തോന്നുന്നു അദ്ദേഹം പറഞ്ഞത് stereo എന്നാണ്.
എങ്ങോട്ടാണ് എന്ന് ചോദിച്ചപ്പോ “സാറെ ഒരബദ്ധം പറ്റിയതാണ്. ക്ഷമിക്കണം, “എന്ന്. ചെറുതായി മനസ്സലിവ് തോന്നിയെങ്കിലും ഉടൻ കോളറിനു കുത്തിപ്പിടിച്ചു തൊട്ടടുത്ത കടയിൽ കൊണ്ടുപോയി ചാരിനിർത്തി. ആൾക്കാരെ വിളിച്ചുകൂട്ടി, പിന്നെ police ആയി പത്രക്കാരായി..
എന്തായാലും museum station ൽ case എടുത്തു അയാളെ അകത്താക്കിയിട്ടുണ്ട്.
അങ്ങനെ service ൽ ഇരിക്കെ സ്വന്തം വാഹനത്തിലെ മോഷണം കണ്ടുപിടിച്ചു ആ പാപഭാരം ഞാനിന്നു കഴുകി കളഞ്ഞു സുഹൃത്തുക്കളെ
