മുംബൈ: വനിതാ പ്രീമിയർ ലീഗിൽ റോയൽ ചലഞ്ചേഴ്സ് ബാംഗ്ലൂരിനെതിരെ ഡൽഹി ക്യാപ്പിറ്റൽസിന് 60 റൺസിന്റെ തകർപ്പൻ ജയം. ടോസ് നഷ്ടമായി ആദ്യം ബാറ്റിംഗിനിറങ്ങിയ ഡൽഹി 20 ഓവറിൽ 2 വിക്കറ്റ് നഷ്ടത്തിൽ 223 റൺസ് എടുത്തു. ക്യാപ്ടൻ മെഗ് ലാനിംഗിന്റെയും ഓപ്പണർ ഷഫാലി വർമയുടെയും തകർപ്പൻ അർദ്ധ സെഞ്ച്വറികളാണ് ഡൽഹിക്ക് കൂറ്റൻ സ്കോർ സമ്മാനിച്ചത്. മറുപടി ബാറ്റിംഗിൽ ബാംഗ്ലൂരിന്റെ പോരാട്ടം 20 ഓവറിൽ 8 വിക്കറ്റ് നഷ്ടത്തിൽ 163 റൺസിൽ അവസാനിച്ചു.
തുടക്കം മുതൽ ബാംഗ്ലൂർ ബൗളർമാർക്കെതിരെ ആക്രമണം അഴിച്ചു വിട്ട ഡൽഹി ഓപ്പണർമാർ 14.3 ഓവറിൽ 162 റൺസിന്റെ കൂട്ടുകെട്ട് പടുത്തുയർത്തി. ഷഫാലി 45 പന്തിൽ 84 റൺസ് എടുത്തപ്പോൾ ലാനിംഗ് 43 പന്തിൽ 72 റൺസ് നേടി. ഇരുവരെയും ഒരേ ഓവറിൽ തന്നെ ഹീതർ നൈറ്റ് പുറത്താക്കിയെങ്കിലും പിന്നീട് വന്ന മരിസാനെ കാപ്പും ജെമീമ റോഡ്രിഗസും ആക്രമണം തുടർന്നു. കാപ്പ് 17 പന്തിൽ 39 റൺസുമായും ജെമീമ 15 പന്തിൽ 22 റൺസുമായും പുറത്താകാതെ നിന്നു.
ചേസിംഗിൽ, പൊരുതി നോക്കാനുള്ള ശ്രമങ്ങൾ പലപ്പോഴായി ബാംഗ്ലൂരിന്റെ ഭാഗത്ത് നിന്നും ഉണ്ടായെങ്കിലും, ഏകോപനം ഇല്ലാതെ പോയത് അവർക്ക് തിരിച്ചടിയായി. 35 റൺസെടുത്ത ക്യാപ്ടൻ സ്മൃതി മന്ഥാനയാണ് ബാംഗ്ലൂരിന്റെ ടോപ് സ്കോറർ. ഹീതർ നൈറ്റ് 34 റൺസും എല്ലിസ് പെറി 31 റൺസും എടുത്തപ്പോൾ, വാലറ്റത്ത് മേഗൻ ഷട്ട് 19 പന്തിൽ 30 റൺസുമായി പുറത്താകാതെ നിന്നു.
4 ഓവറിൽ 29 റൺസിന് 5 വിക്കറ്റ് വീഴ്ത്തിയ ടാറ നോറിസിന്റെ പ്രകടനമാണ് ബാംഗ്ലൂരിനെ ശിഥിലമാക്കിയത്. അലീസ് കാപ്സി 2 വിക്കറ്റും ശിഖ പാണ്ഡെ ഒരു വിക്കറ്റും വീഴ്ത്തി.
