മാര്‍ച്ച് മാസത്തിലെ പൗര്‍ണ്ണമി ഇന്നാണ്. ശൈത്യകാലത്തെ അവസാന പൗര്‍ണ്ണമിയെന്ന പ്രത്യേകതയും ഇന്നത്തെ പൂര്‍ണ്ണചന്ദ്ര രാവിനുണ്ട്. ഇന്നലെയും ഇന്നും ആകാശത്ത് തെളിയുന്ന ചന്ദ്രന് നല്ല തിളക്കമായിരിക്കുമെന്നതിനാല്‍ വാനനിരീക്ഷകര്‍ക്ക് ആവോളം ചന്ദ്രിക നുകരാന്‍ പറ്റിയ ദിവസമാണിന്ന്. കുറച്ച് ദിവസങ്ങള്‍ കൂടി നല്ല നിലാവുണ്ടാകുമെങ്കിലും ഇന്ന് വൈകുന്നേരം 6.30നായിരിക്കും ചന്ദ്രന് ഏറ്റവുമധികം തിളങ്ങുക.
വേം മൂണ്‍ എന്താണ്?
ചില പൗര്‍ണ്ണമി ദിനങ്ങള്‍ പ്രത്യേക പേരുകളില്‍ അറിയപ്പെടാറുണ്ട്. അപ്പപ്പോഴുള്ള ഋതുക്കളെ അടിസ്ഥാനമാക്കിയും പൗര്‍ണ്ണമി ദിനങ്ങളെ പ്രത്യേക പേരുകളില്‍ വിളിക്കാറുണ്ട്. അത്തരത്തില്‍ മാര്‍ച്ച് മാസത്തിലെ പൗര്‍ണ്ണമിക്ക് ലഭിച്ച പേരാണ് ‘വേം മൂണ്‍’. പതിനെട്ടാം നൂറ്റാണ്ടില്‍ അമേരിക്കയിലെ ഒരു ഗോത്ര വിഭാഗമാണ് ശൈത്യമാസത്തിലെ പൂര്‍ണ്ണചന്ദ്രനെ വേം മൂണ്‍ എന്ന് വിളിച്ചുതുടങ്ങിയത്. വസന്തം വരുന്നതിന് മുന്നോടിയായി മണ്ണിനുള്ളിലെ ശൈത്യകാല ഒളിസങ്കേതങ്ങളില്‍ നിന്നും മണ്ണിര അടക്കമുള്ള ജന്തുക്കള്‍ പുറത്തുവരുന്നത് കൊണ്ടാണ് വേം മൂണ്‍ എന്ന പേര് തെരഞ്ഞെടുത്തത്.
പണ്ടുള്ളവര്‍ ഇത്തരത്തിലുള്ള മാറ്റങ്ങളിലൂടെയാണ് പുതിയ ഋതുക്കളുടെ വരവറിഞ്ഞിരുന്നത്. ശൈത്യകാലം അവസാനിക്കുമ്പോള്‍ മണ്ണ് മൃദുവാകാന്‍ തുടങ്ങുകയും മണ്ണിരകള്‍ ഉള്‍പ്പടെയുള്ള ജീവികള്‍ വീണ്ടും മണ്ണിന് വെളിയിലെത്തുകയും അവയെ കൊത്തിത്തിന്നാന്‍ പക്ഷികള്‍ എത്തുകയും ചെയ്യുന്നു. വസന്തത്തിന്റെ ആദ്യകാഴ്ചയാണ് കര്‍ഷകര്‍ക്കിത്. വേരുകള്‍ കൂടുതല്‍ മണ്ണിലേക്കാഴ്ന്നിറങ്ങുകയും തണുപ്പില്‍ നിന്നുണര്‍ന്ന് ഭൂമി പുനര്‍ജനിയിലൂടെ കടന്നുപോകുകയും ചെയ്യുന്ന വസന്തം അവര്‍ക്ക് മുന്നില്‍ തെളിയുന്നത് വേം മൂണിലൂടെയാണ്.
മാര്‍ച്ചിലെ പൗര്‍ണ്ണമിക്ക് ‘സാപ് മൂണ്‍’ എന്നൊരു പേരും കൂടിയുണ്ട്. മേപ്പിള്‍ മരങ്ങളില്‍ നിന്നുള്ള നീര് ഒഴുകുന്നത് ഇക്കാലത്ത് ആയതുകൊണ്ടാണ് ഈ പേര്. നാസയില്‍ നിന്നുള്ള വിവരം അനുസരിച്ച് മാര്‍ച്ചിലെ പൂര്ണ്ണചന്ദ്രന് ക്രോ മൂണ്‍, ക്രസ്റ്റ് മൂണ്‍, ഷുഗര്‍ മൂണ്‍ തുടങ്ങിയ പേരുകളും ഉണ്ട്.
സൂപ്പര്‍മൂണ്‍ ആയിരിക്കുമോ?
മാര്‍ച്ചിലെ പൂര്ണ്ണചന്ദ്രന് സൂപ്പര്‍മൂണ്‍ അല്ല. ഭൂമിക്ക് ചുറ്റുമുള്ള ഭ്രമണപഥത്തില്‍ ഭൂമിയോട് ഏറ്റവും അടുത്തുള്ള പോയിന്റില്‍ ആയിരുക്കുമ്പോഴുള്ള പൂര്‍ണ്ണചന്ദ്രനെ ആണ് സൂപ്പര്‍മൂണ്‍ എന്ന് വിളിക്കുന്നത്. ഒരു വര്‍ഷത്തില്‍ നിരവധി തവണ സൂപ്പര്‍മൂണ്‍ ഉണ്ടാകാറുണ്ട്. 2023ല്‍ ആകെ നാല് സൂപ്പര്‍മൂണുകളാണ് ഉണ്ടാകുക. ആദ്യത്തേത് ജൂലൈ 3നായിരിക്കും. പിന്നീട് ആഗസ്റ്റ് 1, ആഗസ്റ്റ് 31, സെപ്റ്റംബര്‍ 29 എന്നീ ദിവസങ്ങളിലും സൂപ്പര്‍മൂണ്‍ ദൃശ്യമാകും. ഇതില്‍ ആഗസ്റ്റിലെ സൂപ്പര്‍മൂണ്‍ ബ്ലൂമൂണും ആയിരിക്കും.
ആഘോഷങ്ങള്‍
പൗര്‍ണ്ണമിയോട് അനുബന്ധിച്ച് കൊണ്ടാടുന്ന പല ആഘോഷങ്ങളും ഉണ്ട്. യൂറോപ്പില്‍ വേം മൂണ്‍ ‘ലാന്റെന് മൂണ്‍’ എന്നും അറിയപ്പെടുന്നു. ക്രൈസ്തവര്‍ ഈസ്റ്ററിനു മുന്നോടിയായുള്ള ഉപവാസം ആരംഭിക്കുന്നത് ഈ സമയത്താണ്. ജൂതന്മാര്‍ ഈ സമയത്ത് പുരിം ആഘോഷിക്കുന്നു. പ്രാചീന പേര്‍ഷ്യയില്‍ തങ്ങളെ കൊലപ്പെടുത്താനുള്ള ഒരു പദ്ധതിയില്‍ നിന്നും രക്ഷപ്പെട്ടതിന്റെ ഓര്‍മ്മ പുതുക്കലാണ് ഈ ആഘോഷം. ഇന്ത്യയില്‍ നിറങ്ങളുടെ ആഘോഷമായ ഹോളി കൊണ്ടാടുന്നത് മാര്‍ച്ച് മാസത്തിലെ പൗര്‍ണ്ണമിയോട് അനുബന്ധിച്ചാണ്. ദുഷ്ടശക്തികള്‍ക്ക് മേല്‍ നന്മ നേടുന്ന വിജയത്തിന്റെ ആഘോഷമാണ് ഹോളി. കമ്പോഡിയ, ലാവോസ്, തായ്‌ലന്‍ഡ്, ശ്രീലങ്ക എന്നിവിടങ്ങളിലെ ബുദ്ധമത വിശ്വാസികള്‍ ഈ പൗര്‍ണ്ണമി മാഘ പൂജ ആചരിക്കുന്നു. ബുദ്ധന്‍ തന്റെ ശിഷ്യഗണങ്ങള്‍ക്കൊപ്പം ആഘോഷിച്ചിരുന്നതാണ് ഈ ആഘോഷമെന്നാണ് വിശ്വാസം
