കൊൽക്കത്ത: പശ്ചിമ ബംഗാളിലെ ഹൂഗ്ലി ജില്ലയിൽ ഇന്നലെ വൈകുന്നേരം രാമനവമി ഘോഷയാത്രയ്ക്കിടെ ഉണ്ടായ ആക്രമണത്തിൽ ബിജെപി എംഎൽഎക്ക് പരിക്കേറ്റു. പുർസുരയിലെ ബിജെപി എംഎൽഎ ബിമൻ ഘോഷിനാണ് അക്രമത്തിൽ പരിക്കേറ്റത്. സംഘർഷത്തെ തുടർന്ന് പ്രദേശത്ത് നിരോധനാജ്ഞ ഏർപ്പെടുത്തുകയും ഇന്റർനെറ്റ് സേവനങ്ങൾക്ക് താത്കാലിക നിയന്ത്രണം ഏർപ്പെടുത്തുകയും ചെയ്തിട്ടുണ്ട്.
എംഎൽഎക്ക് പുറമെ ഏതാനും പോലീസുകാർക്കും ആക്രമണത്തിൽ പരിക്കേറ്റിട്ടുണ്ട്. ജിടി റോഡിലെ വെല്ലിംഗ്ടൺ ജൂട്ട് മില്ലിന് സമീപം ഇന്നലെ വൈകിട്ട് 6.15ഓടെയാണ് സംഭവം. ജഗന്നാഥ ക്ഷേത്രത്തിലേക്ക് ഘോഷയാത്ര പോകുന്ന വഴി തങ്ങൾക്ക് നേരെ കല്ലേറുണ്ടായെന്ന് ബിജെപി വൈസ് പ്രസിഡന്റ് ദിലീപ് ഘോഷ് ആരോപിച്ചു. അതേസമയം ആക്രമണവുമായി ബന്ധപ്പെട്ട് ഇതുവരെ ആരെയും അറസ്റ്റ് ചെയ്തിട്ടില്ല. പ്രദേശത്ത് പോലീസ് കനത്ത സുരക്ഷയാണ് ഏർപ്പെടുത്തിയിരിക്കുന്നത്.
ഇന്ന് രാത്രി 10 വരെയാണ് പലയിടങ്ങളിലും ഇന്റർനെറ്റ് സേവനങ്ങൾക്ക് നിരോധനം ഏർപ്പെടുത്തിയിരിക്കുന്നത്. അക്രമികൾക്കെതിരെ കർശന നടപടി സ്വീകരിക്കുമെന്ന് ഗവർണർ സിവി ആനന്ദ ബോസ് പറഞ്ഞു. വ്യാഴം, വെള്ളി ദിവസങ്ങളിലും ഹൗറ ജില്ലയിലെ പല ഭാഗങ്ങളിലും രാമനവമി ആഘോഷത്തിനിടെ സാമൂഹിക വിരുദ്ധർ ആക്രമണം അഴിച്ചു വിട്ടിരുന്നു. സംഭവവുമായി ബന്ധപ്പെട്ട് 45ലധികം ആളുകളെയാണ് ഇതുവരെ അറസ്റ്റ് ചെയ്തിട്ടുള്ളത്.
