മുംബൈ: ആർഎസ്എസ് സർസംഘ് ചാലക് മോഹൻ ഭാഗവത് തനിക്കും മറ്റു പലർക്കും പ്രചോദനവും ഊർജവും പകരുന്നതായി മഹാരാഷ്ട്ര മുഖ്യമന്ത്രി ഏകനാഥ് ഷിൻഡെ. നാഗ്പൂരിൽ നാഷണൽ ക്യാൻസർ ഇൻസ്റ്റിറ്റ്യൂട്ട് (എൻസിഐ) കെട്ടിപ്പടുക്കുന്നതിൽ ആർഎസ്എസ് കേഡർ നടത്തിയ ശ്രമങ്ങളെ ഏക്‌നാഥ് ഷിൻഡെ പ്രശംസിച്ചു.നാഗ്പൂരിൽ നാഷണൽ ക്യാൻസർ ഇൻസ്റ്റിറ്റ്യൂട്ടിന്റെ ഉദ്ഘാടന ചടങ്ങിൽ സംസാരിക്കവെയാണ് ഏക് നാഥ് ഷിൻഡെ സർസംഘ ചാലകിനെ പ്രശംസിച്ചത്.
‘മോഹൻ ഭഗവത് ജി നമുക്കും മറ്റെല്ലാവർക്കും പ്രചോദനത്തിന്റെയും ഊർജ്ജത്തിന്റെയും ഉറവിടമാണ്. നല്ല ജോലി ചെയ്യുന്ന ആളുകളെ അദ്ദേഹം എപ്പോഴും പിന്തുണയ്ക്കുന്നു. നാഷണൽ ക്യാൻസർ ഇൻസ്റ്റിറ്റ്യൂട്ട് കെട്ടിപ്പടുക്കുന്നതിൽ അദ്ദേഹം പ്രചോദനമായി നിന്നുവെന്നും അദ്ദേഹം പറഞ്ഞു. ആർഎസ്എസും അതിന്റെ തലവനും പിന്തുണ നൽകുന്നതിനാൽ തന്നെ മഹത്തായ പദ്ധതികൾ സാധ്യമാകുമെന്ന് അദ്ദേഹം കൂട്ടിച്ചേർത്തു.
മോഹൻ ഭാഗവത്, കേന്ദ്രമന്ത്രി നിതിൻ ഗഡ്കരി, സംസ്ഥാന ഉപമുഖ്യമന്ത്രി ദേവേന്ദ്ര ഫഡ്നാവിസ്, വ്യവസായി ഗൗതം അദാനി എന്നിവരുടെ സാന്നിധ്യത്തിലായിരുന്നു ഏകനാഥ് ഷിൻഡെ ഈ പരാമർശങ്ങളെല്ലാം.
