തിന്മയുടെ മേൽ നന്മയുടെ വിജയത്തെ കേന്ദ്രീകരിച്ചുള്ള രാമായണത്തെ അടിസ്ഥാനമാക്കി ഒരുക്കുന്ന ആദിപുരുഷ് എന്ന ചിത്രത്തിന്റെ ടീസർ പുറത്തിറങ്ങിയത് മുതൽ ആരാധകർ ആവേശത്തോടെയാണ് കാത്തിരിക്കുന്നത്. പ്രഭാസ് നായകനാകുന്ന ചിത്രത്തിന്റെ പ്രീ റിലീസ് പരിപാടികൾ പുരോഗമിക്കുകയാണ്. ഇതിനിടെ സിനിമയുടെ റിലീസുമായി ബന്ധപ്പെട്ടുള്ള പുതിയ വിവരങ്ങളാണ് ഇപ്പോൾ ശ്രദ്ധനേടുന്നത്.
സിനിയുടെ 10,000 ടിക്കറ്റുകൾ സൗജന്യമായി നൽകുമെന്ന് കാർത്തികേയ 2 നിർമ്മാതാവ് അഭിഷേക് അഗർവാൾ അറിയിച്ചു. തെലങ്കാനയിലുടനീളമുള്ള സർക്കാർ സ്‌കൂളുകളിലെയും അനാഥാലയങ്ങളിലെയും കുട്ടികൾക്കും വൃദ്ധസദനങ്ങളിലെ ആളുകൾക്കുമാണ് ടിക്കറ്റ് സൗജന്യമായി നൽകുക. ഇത് ലഭിക്കുന്നതിന് വ്യക്തികൾ അവരുടെ പേര്, സ്‌കൂൾ/ഓർഗനൈസേഷൻ, അവരുടെ ഒരു ചിത്രം ഉൾപ്പെടെയുള്ള ഗൂഗിൾ ഫോം പൂരിപ്പിക്കണം.
ജീവിതത്തിൽ ഒരിക്കൽ മാത്രം കാണുന്ന എല്ലാവരും ആഘോഷിക്കേണ്ട ചിത്രമാണ് ആദിപുരുഷ്. ശ്രീരാമനോടുള്ള ഭക്തിയാണ് തന്നെക്കൊണ്ട് ഇതെല്ലാം ചെയ്യിക്കുന്നത് എന്നും അദ്ദേഹം ട്വിറ്ററിൽ കുറിച്ചു.
ഈ മാസം 16 നാണ് ചിത്രം തിയേറ്ററുകളിലെത്തുന്നത്. ഓം റൗത്ത് സംവിധാനം ചെയ്ത ചിത്രത്തിൽ പ്രഭാസ് കൂടാതെ, കൃതി സനോൺ, സെയ്ഫ് അലി ഖാൻ, സണ്ണി സിംഗ്, ദേവദത്ത നാഗെ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ചിത്രത്തിന്റെ ആകെ ബജറ്റ് 500 കോടിയാണ്.
