ചണ്ഡീഗഡ്: ഹരിയാനയിലെ നൂഹിൽ നിയന്ത്രണങ്ങൾക്ക് ഇളവ് നൽകി സർക്കാർ. സ്വാതന്ത്ര്യദിന ആഘോഷങ്ങളുടെ പശ്ചാത്തലത്തിലാണ് നിരോധനാജ്ഞയ്ക്ക് ഇളവ് നൽകാനുള്ള സർക്കാർ തീരുമാനം. ഇതുമായി ബന്ധപ്പെട്ട് നൂഹ് ജില്ലാ മജിസ്‌ട്രേറ്റ് ഉത്തരവ് പുറപ്പെടുവിച്ചു.
ആഘോഷങ്ങൾ പ്രമാണിച്ച് ഇന്നും നാളെയുമാണ് ഇളവ് നൽകിയിരിക്കുന്നത്. രാവിലെ ആറ് മുതൽ വൈകീട്ട് എട്ടുവരെ ഇളവുള്ളത്. രാത്രി എട്ട് മണി മുതൽ രാവിലെവരെ നിയന്ത്രണങ്ങൾ കർശനമായി തുടരും. ഈ സമയങ്ങളിൽ അവശ്യസേവനങ്ങൾക്ക് മാത്രമേ ഇളവ് നൽകുകയുള്ളൂ.അതേസമയം അനാവവശ്യമായി സംഘം ചേരുന്നതുൾപ്പെടെയുള്ള നിയമ വിരുദ്ധമായ കാര്യങ്ങൾ ഒഴിവാക്കണമെന്ന് അറിയിച്ചിട്ടുണ്ട്. ഇളവുടെ പശ്ചാത്തലത്തിൽ സ്ഥലത്ത് ജാഗ്രത പുലർത്തണമെന്ന് പോലീസിനും നിർദ്ദേശമുണ്ട്.
ഇളവുമായി ബന്ധപ്പെട്ട് പുറപ്പെടുവിക്കുന്ന നിർദ്ദേശങ്ങൾ കൃത്യമായി പാലിക്കണം എന്നാണ് ജില്ലാ മജിസ്‌ട്രേറ്റ് നൂഹ് പോലീസ് സൂപ്രണ്ടിന് നൽകിയിരിക്കുന്ന നിർദ്ദേശം. നിയന്ത്രണമുള്ള സമയങ്ങളിൽ അടിയന്തിര സേവനങ്ങൾ ആവശ്യമുള്ളവർക്ക് അത് ഉറപ്പുവരുത്തണം. കർഫ്യൂ പാസുകൾ ആവശ്യാനുസരണം വിതരണം ചെയ്യുന്ന കാര്യത്തിൽ വീഴ്ച വരുത്തരുത് എന്നും ജില്ലാ മജിസ്‌ട്രേറ്റ് നിർദ്ദേശിച്ചിട്ടുണ്ട്.
