വാർദ്ധക്യത്തിൽ ആരെയും ആശ്രയിക്കാതെ സ്വന്തം കാര്യങ്ങൾ ചെയ്യാൻ ഇപ്പോഴെ സാമ്പത്തിക സുരക്ഷിത്വത്തിനുള്ള വഴികൾ തേടിയാലോ? അത്തരക്കാർക്കുള്ള ഒരു അടിപൊളി പെൻഷൻ പദ്ധതിയാണ് കേന്ദ്രസർക്കാരിന്റെ അടൽ പെൻഷൻ യോജന. എല്ലാ ദിവസവും ചെറിയ തുക മാറ്റിവച്ച് പദ്ധതിയിൽ നിക്ഷേപിച്ചാൽ നിക്ഷേപത്തിന് അനുസരിച്ച് 1,000 രൂപ മുതൽ 5,000 രൂപ വരെ പെൻഷൻ ലഭിക്കും. 18 വയസ് മുതൽ 40 വരെയാണ് ഈ പദ്ധതിയുടെ നിക്ഷേപ പദ്ധതി.
പദ്ധതി പ്രകാരം പെൻഷൻ ലഭിക്കാൻ കുറഞ്ഞത് 20 വർഷം നിക്ഷേപിക്കണം. നിങ്ങൾക്ക് 60 വയസ്സ് തികയുമ്പോൾ തന്നെ പെൻഷൻ ലഭിക്കാൻ തുടങ്ങും. ഒരു മാസം 42 രൂപ മുതൽ 210 രൂപ വരെ അടച്ച് പരമാവധി 5,000 രൂപ വരെ പെൻഷൻ നേടാം. ഏറ്റവും കുറഞ്ഞ പെൻഷൻ തുക 1,000 രൂപയാണ്. അതായത് നിങ്ങളുടെ പ്രായം 18 വയസ്സ് ആണെന്ന് കരുതുക, തുടർന്ന് എല്ലാ മാസവും 210 രൂപ, അതായത് ഈ സ്‌കീമിൽ പ്രതിദിനം 7 രൂപ നിക്ഷേപിച്ചാൽ, 60 വയസ്സിന് ശേഷം നിങ്ങൾക്ക് പ്രതിമാസം 5000 രൂപ പെൻഷൻ ലഭിക്കും.
സേവിംഗ്‌സ് അക്കൗണ്ടിൽ നിന്നും ബാങ്ക് മുഖേന പദ്ധതിയിലേക്ക് തുക ഈടാക്കും.പ്രതിമാസ പെൻഷൻ വരിസംഖ്യക്ക് അനുസരിച്ചായിരിക്കും ലഭിക്കുക. നിക്ഷേപകർ നൽകുന്ന വിഹിതത്തിന് അനുസരിച്ച് സർക്കാരും പദ്ധതിയിലേക്ക് സംഭാവന നൽകും.
അസംഘടിത നമേഖലയിൽ ജോലി ചെയ്യുന്നവർക്കായുള്ള പെൻഷൻ പദ്ധതിയാണിത്. സർക്കാരിതര സ്ഥാപനങ്ങളിലും കച്ചവട സ്ഥാപനങ്ങളിലും ജോലി ചെയ്യുന്നവർ, കെട്ടിട നിർമാണത്തൊഴിലാളികൾ, വീട്ടുജോലിക്കാർ, തുടങ്ങി വിവിധ മേഖലകളിൽ ജോലി ചെയ്യുന്ന സ്ത്രീകളുൾപ്പെടെയുളളവർക്ക് പ്രതിമാസ പെൻഷൻ നേടിത്തരുന്ന സമ്പാദ്യ പദ്ധതിയാണ് അടൽ പെൻഷൻ യോജന. മരണമടഞ്ഞാൽ നോമിനിക്ക് തുക ലഭിക്കും. പൊതുമേഖലാ ബാങ്കുകൾ, പ്രാദേശിക ഗ്രാമീണ ബാങ്കുകൾ, സ്വകാര്യ ബാങ്കുകൾ, സ്‌മോൾ ഫിനാൻസ് ബാങ്കുകൾ, പേയ്മെന്റ് ബാങ്കുകൾ, തപാൽ വകുപ്പ് ,സഹകരണ ബാങ്കുകൾ എന്നിവ മുഖേന പദ്ധതിയിൽ അംഗങ്ങളാകാമെന്ന് പദ്ധതിയുടെ ഗുണങ്ങളിലൊന്നാണ്.
