പുറത്തിറങ്ങിയാൽ വെന്ത് പോകുന്നത്ര ചൂടാണ് ഇപ്പോൾ അനുഭവപ്പെടുന്നത്. പല ജില്ലകളിലും അലർട്ടുകളും കാലാവസ്ഥ വകുപ്പ് പ്രഖ്യാപിച്ചിട്ടുണ്ട്. കോട്ടൺ വസ്ത്രങ്ങളണിഞ്ഞും വെള്ളം ധാരാളം കുടിച്ചും സൺസ്‌ക്രീൻ ഉപയോഗിച്ചും എല്ലാം ആളുകൾ ചൂടിനെ പ്രതിരോധിക്കാനായി പെടാപാടു പെടുകയാണ്. ചൂട് കാലമായത് കൊണ്ട് തന്നെ തെരുവോരങ്ങളിൽ പലവിധ പഴവർഗങ്ങളും വിൽപ്പനയ്ക്ക് നിരത്തി വച്ചിരിക്കുന്നത് കാണാം. വേനൽക്കാലത്ത് ഏറ്റവും സുലഭമായി കിട്ടുന്ന പഴവർഗമാണ് തണ്ണിമത്തൻ.
ആരോഗ്യ ഗുണങ്ങളുടെ കലവറയാണ് തണ്ണിമത്തൻ. പലപ്പോഴും ആരോഗ്യത്തിനും പല വിധത്തിലുള്ള പ്രശ്നങ്ങൾ ഉണ്ടാവുന്നുണ്ട്. ആരോഗ്യത്തിന് വില്ലനാവുന്ന പല അവസ്ഥകൾക്കും പരിഹാരം കാണുന്നതിന് തണ്ണിമത്തൻ ഉത്തമമാണ്. തണ്ണിമത്തന്റെ 92 ശതമാനവും വെള്ളമാണ്. നിർജ്ജലീകരണം ഇല്ലാതാക്കുന്നതിനുള്ള ഏറ്റവും വലിയ ഒന്നാണ് തണ്ണിമത്തൻ ഉന്മേഷം ലഭിക്കുന്നതിനും പല ആരോഗ്യ പ്രശ്നങ്ങൾക്കും പരിഹാരം കാണുന്നതിന് സഹായിക്കുന്നു. വിറ്റാമിൻ ബി 6, വിറ്റാമിൻ ബി 1, വിറ്റാമിൻ സി എന്നിവയെല്ലാം ധാരാളം തണ്ണിമത്തനിൽ അടങ്ങിയിട്ടുണ്ട്. കൊഴുപ്പും കൊളസ്‌ട്രോളും ഊർജ്ജവും നാരും,അന്നജവും കുറവായ തണ്ണിമത്തനിൽ ധാരാളം ജലാംശവും വൈറ്റമിനും മിനറലുകളും ആന്റിഓക്‌സിഡന്റുകളുമുണ്ട്.ഇത് രോഗപ്രതിരോധ ശേഷി വർദ്ധിപ്പിക്കാൻ സഹായിക്കുന്ന ഒന്നാണ് എന്ന കാര്യത്തിൽ സംശയം വേണ്ട.
ആരോഗ്യഗുണങ്ങൾ ഏറെയായതിനാൽ തെരുവിൽ തണ്ണി മത്തൻ വിൽപ്പനയ്ക്ക് വച്ചത് കാണുമ്പോൾ ആരായാലും ഒന്ന് വാങ്ങിപ്പോകും. എന്നാൽ തണ്ണി മത്തൻ വാങ്ങും മുൻപ് ചില കാര്യങ്ങൾ ശ്രദ്ധിച്ചാൽ കൊടുത്ത കാശ് മുതലാവും.
തണ്ണിമത്തനിൽ വിരലുകൾ കൊണ്ടു തട്ടുമ്പോഴുള്ള ശബ്ദ വ്യത്യാസം നോക്കി പഴുത്തതാണോ എന്നു തിരിച്ച് അറിയാം. ആഴത്തിൽ നിന്നുള്ള ശബ്ദം പാകത്തിനു വിളഞ്ഞതിനെയും ഫ്രീക്വൻസി കൂടിയ ശബ്ദം വിളവു കുറഞ്ഞതിനെയും ഫ്‌ലാറ്റായ ശബ്ദം പഴുത്തു പോയതിനെയും സൂചിപ്പിക്കുന്നു.
ഒരേ പോലുള്ള രണ്ടു തണ്ണമത്തൻ കൈകളിൽ എടുക്കുമ്പോൾ അതിൽ ഭാരക്കൂടുതൽ തോന്നുന്നത് വാങ്ങിക്കാം. ഇതിനു ജ്യൂസ് കൂടുതലാകും
തണ്ണിമത്തൻ മണത്തു നോക്കുമ്പോൾ കിട്ടുന്ന സ്വീറ്റ് സ്‌മെൽ അതിന്റെ വിളവിനെ സൂചിപ്പിക്കുന്നു. യാതൊരു മണവും കിട്ടുന്നില്ലെങ്കിൽ വിളഞ്ഞു പാകമായിട്ടില്ല.
നന്നായി പഴുത്ത തണ്ണിമത്തന്റെ പുറന്തോടിൽ വിരലുകൾ കൊണ്ടു അമർത്താൻ സാധിക്കും. വിളവു പാകമാകത്തതിന്റെ പുറം തോടിനു കട്ടി കൂടുതലായിരിക്കും
നിറം പരിശോധിച്ച് അറിയാം, കടുംപച്ച നിറത്തിലും ഇളംപച്ചയിലുമുള്ളവ വിളഞ്ഞു പാകമായതാണ്. മഞ്ഞ നിറത്തോടു കൂടിയത് പാകമായി എന്നാണ് അർത്ഥമാക്കുന്നത്. തണ്ണിമത്തന്റെ പുറത്ത് മഞ്ഞയ്ക്കു പകരം വെളുത്ത നിറമാണെങ്കിൽ, മൂപ്പെത്താതെ പറിച്ചെടുത്തതാകാനാണ് സാധ്യത.
തണ്ണി മത്തൻ ഫ്രിഡ്ജിൽ വയ്ക്കാതെ ഉപയോഗിക്കൂ
കാശ് കുറവായത് കൊണ്ടുതന്നെ തണ്ണിമത്തൻ വാങ്ങി സൂക്ഷിച്ചു വയ്ക്കുന്നവരായിരിക്കും പലരും. എന്നാൽ തണ്ണിമത്തൻ റഫ്രിജറേറ്ററിൽ സൂക്ഷിക്കരുതെന്നാണ് വിദഗ്ധർ പറയുന്നത്. പുറത്ത് അന്തരീക്ഷ ഊഷ്മാവിൽ വച്ച തണ്ണിമത്തന് കൂടുതൽ പോഷക ഗുണമുണ്ടാകും. അത് പോലെ തന്നെ മുറിച്ച തണ്ണിമത്തൻ റഫ്രിജറേറ്ററിലും സൂക്ഷിക്കരുത്. ഇത് ബാക്ടീരിയ വളരാൻ കാരണമാകുമത്രേ.
അതുപോലെ തണ്ണിമത്തനിൽ അടങ്ങിയിട്ടുള്ള ലൈസോപീനും സിമ്പിൾ കാർബോഹൈഡ്രേറ്റും പ്രശ്‌നക്കാർ ആയി മാറും. അത് ദഹനകുറവിനും വയറു കമ്പിക്കലിനും വായുപ്രശ്‌നം, വയറിളക്കം, മലബന്ധം എന്നിവയ്ക്കും കാരണമാകാം. പൊട്ടാസ്യം കൂടുതൽ ഉള്ളതിനാൽ കിഡ്‌നി രോഗങ്ങളുള്ളവർ ഡോക്ടറുടെയോ ഡയറ്റീഷ്യന്റെയോ ഉപദേശപ്രകാരം മാത്രമേ ഇവ ഉപയോഗിക്കാവൂ. ഊർജത്തിന്റെ അളവ് കുറവാണെങ്കിലും ഗ്ലൈസെമിക് ഇൻഡക്‌സ് കൂടുതലുള്ളതിനാൽ തണ്ണിമത്തൻ അമിതമായി ഉപയോഗിക്കുന്നത് പ്രമേഹ രോഗികളുടെ രക്തത്തിലെ പഞ്ചസാരയുടെ അളവ് കൂടാൻ ഇടയാക്കും. അമിതമായി മദ്യപാനം നടത്തുന്നവർ മിതമായ അളവിൽ തണ്ണിമത്തൻ ഉപയോഗിക്കുന്നതാണ് ഉത്തമം.
