എറണാകുളം: സ്വർണ വ്യവസായി ബോബി ചെമ്മണ്ണൂരിനെതിരെ പോലീസിൽ പരാതി നൽകി നടി ഹണി റോസ്. അശ്ലീല പരാമർശങ്ങൾ നടത്തിയ സംഭവത്തിലാണ് പരാതി നൽകിയത്. എറണാകുളം സെൻട്രൽ പോലീസിൽ നൽകിയ പരാതി പരിശോധിച്ചുവരികയാണ്.
സോഷ്യൽ മീഡിയയിലൂടെയാണ് ഹണി റോസ് പരാതി നൽകിയ കാര്യം വ്യക്തമാക്കിയത്. ബോബി ചെമ്മണ്ണൂർ തുടർച്ചയായി നടത്തിയ അശ്ലീല അധിക്ഷേപങ്ങൾക്കെതിരെ സെൻട്രൽ പോലീസിൽ പരാതി നൽകിയതായി നടി പറഞ്ഞു. തുടർ ദിവസങ്ങളിലും അധിക്ഷേപം നടത്തിയവർക്കെതിരെ നടപടി സ്വീകരിക്കുമെന്നും നടി വ്യക്തമാക്കി.
ഫേസ്ബുക്ക് പോസ്റ്റിന്റെ പൂർണരൂപം
ബോബി ചെമ്മണ്ണൂർ, താങ്കൾ എനിക്കെതിരെ തുടർച്ചയായി നടത്തിയ അശ്ലീല അധിക്ഷേപങ്ങളിൽക്കെതിരെ ഞാൻ എറണാകുളം സെൻട്രൽ പോലീസ് സ്‌റ്റേഷനിൽ പരാതി നൽകിയിട്ടുണ്ട്. താങ്കളുടെ തന്നെ മാനസികനിലയുള്ള താങ്കളുടെ കൂട്ടാളികൾക്കെതിരെയുള്ള പരാതികൾ പുറകെ ഉണ്ടാകും. താങ്കൾ താങ്കളുടെ പണത്തിന്റെ ഹുങ്കിൽ വിശ്വസിക്കൂ. ഞാൻ ഭാരതത്തിലെ നിയമ വ്യവസ്ഥയുടെ ശക്തിയിൽ വിശ്വസിക്കുന്നു.
