പരാജയങ്ങളാണ് വിജയത്തിലേക്കുള്ള ചവിട്ടുപടികളെന്ന് കേട്ടിട്ടില്ലേ.. ലോകത്ത് ഇന്ന് തല ഉയർത്തിനിൽക്കുന്ന പല വിജയികളും ഒരിക്കലെങ്കിലും പരാജയത്തിന്റെ കയ്പ്പുനീർ കുടിച്ചിട്ടുണ്ടാവുമെന്നതിൽ സംശയമില്ല. ഫീനിക്‌സ് പക്ഷിയെ പോലെ ചാരത്തിൽ നിന്ന് ഉയർത്തെഴുന്നേൽക്കാൻ കാരണമായ പരാജയങ്ങളും അതുകൊണ്ട് തന്നെ ആഘോഷമാക്കേണ്ടതുണ്ട്. എത്രയെത്ര കല്ലും മുള്ളും നിറഞ്ഞ വഴികളിലൂടെ സഞ്ചരിച്ചാണ് ആളുകൾ വിജയത്തിലേക്ക് എത്തിയതെന്ന് ചിന്തിപ്പിക്കാനും ഓർമ്മിപ്പിക്കാനും, ലോകത്ത് ഒരിടമുണ്ട്. ഭൂതകാലത്തിന്റെ വാതിൽ അടച്ചുവയ്ക്കാനല്ല,അതിൽ നിന്ന് പാഠങ്ങൾ ഉൾക്കൊണ്ട് ജീവിതവിജയത്തിലേക്കുള്ള റിസ്‌കെടുക്കാൻ പ്രചോദിപ്പിക്കുന്ന ഒരു മ്യൂസിയം. പരാജയത്തിന്റെ മ്യൂസിയം. ന്യൂയോർക്കിലെ ബ്രൂക്ക്‌ലിനിലുള്ള ഇൻഡസ്ട്രി സിറ്റിയിലാണ് പരാജയത്തെ ആഘോഷമാക്കാനുള്ള അവസരം ഒരുങ്ങിയിരിക്കുന്നത്.
ലോകമെമ്പാടുമുള്ള പരാജയപ്പെട്ട സേവനങ്ങളുടെയും ഉൽപ്പന്നങ്ങളുടെയും ഒരു ശേഖരം ഈ മ്യൂസിയത്തിൽ കാണാം. നമ്മുക്ക് ചുറ്റിലും അല്ലെങ്കിൽ ഇന്ന് കാണുന്ന പലതിനും പല വലിയ പരാജയങ്ങളും ഉണ്ടായിട്ടുണ്ടെന്ന് ഇവിടെ സന്ദർശിക്കുമ്പോൾ ആളുകൾക്ക് മനസ്സിലാകും. ഇന്ന് ലോകം ആഘോഷിക്കുന്ന പലതും നിർമ്മാണത്തിനിടെ വമ്പൻ അബദ്ധങ്ങളിലൂടെ കടന്ന് പോയതാണ്. നാം ഇന്ന് വ്യാപകമായി ഉപയോഗിക്കുന്ന പല ഉത്പന്നങ്ങളുടെയും നവീനപ്രക്രിയയകളിൽ ഭൂരിഭാഗവും പരാജയപ്പെട്ടിരുന്നു. ഈ ഒരു ആശയത്തിലാണ് മ്യൂസിയം പ്രവർത്തിക്കുന്നത്. മ്യൂസിയം ഓഫ് ഫെയില്യൂർ-ൽ ലോകത്തെ മാറ്റുന്നമെന്ന് കരുതിയ നൂറിലധികം പരാജയപ്പെട്ട ഇന്നോവേഷനുകൾ ഉണ്ട്. പലതും വമ്പൻ കമ്പനികളുടേതാണെന്നതാണ് മറ്റൊരു സവിശേഷത. അതുകൊണ്ട് തന്നെ, സന്ദർശകർക്ക് പരാജയങ്ങളെ സംബന്ധിച്ച് മികച്ച ജീവിത പഠനാനുഭവം നൽകാൻ മ്യൂസിയത്തിനാവുന്നു.
സൈക്കോളജിസ്റ്റും ഓർഗനൈസേഷണൽ സൈക്കോളജിയിൽ പിഎച്ച്ഡിയും ഉള്ള ഡോക്ടർ സാമുവൽ വെസ്റ്റാണ് ഈ മ്യൂസിയം ക്യൂറേറ്റ് ചെയ്തിരിക്കുന്നത്. ലോകത്തിലെ എല്ലാത്തിന്റെയും നവീകരണത്തിനും പുരോഗതിക്കും പരാജയം നേരിടുകയെന്നത് സ്വഭാവികമാണ്. അതിനാൽ പരാജയത്തെ സംബന്ധിച്ച് ക്രിയാത്മകമായ ചർച്ചകളെ ഉത്തേജിപ്പിക്കുകയും അർത്ഥവത്തായ റിസ്‌ക്കുകൾ എടുക്കാൻ ആളുകളെ പ്രചോദിപ്പിക്കുകയും ചെയ്യുക എന്നതാണ് മ്യൂസിയം യാഥാർത്ഥത്തിൽ ലക്ഷ്യമിടുന്നതെന്ന് സാമുവൽ വെസ്റ്റ് പറയുന്നു. പരാജയപ്പെട്ട ഇന്നോവേഷനുകൾ വമ്പൻ കമ്പനികൾക്ക് മാത്രമല്ല ഇവിടെ പ്രദർശിപ്പിക്കാൻ സാധിക്കുക. സന്ദർശകർക്ക് അവരുടെ ഏത് തരത്തിലുള്ള പരാജയങ്ങൾ പങ്കിടാനോ, അത് അറിയുന്നവർക്ക് ജീവിതത്തിൽ പിന്തുടരാൻ സഹായകരമായ ഓർമ്മപ്പെടുത്തലുകൾ എഴുതാനോ കഴിയുന്ന ഒരു ചുവരും ഈ പ്രദർശനത്തിന്റെ ഭാഗമാണ്. പരാജയങ്ങളെ സധൈര്യം നേരിട്ട് മുന്നോട്ടുപോകുന്നവർക്കു മാത്രമേ വിജയിക്കാനാവുകയുള്ളൂവെന്നാണ് ഈ മ്യൂസിയം ബോധ്യപ്പെടുത്തുന്നത്.
ജയപരാജയങ്ങൾ മനുഷ്യ ജീവിതത്തിന്റെ കൂടെപ്പിറപ്പാണ്. ഒരു നാണയത്തിന്റെ ഇരു വശങ്ങൾ പോലെയാണത് പല തവണ വീണ ശേഷമാണല്ലോ ഓരോ കുട്ടിയും നടക്കാൻ പഠിക്കുന്നത്. എന്നപോലെ പരാജയങ്ങളും വീഴ്ചകളുമുണ്ടാകുമ്പോൾ തളരാതെ ലക്ഷ്യത്തിലേക്ക് കുതിക്കണം.
