രാജീവ് കുമാർ സംവിധാനം ചെയ്ത് 1999-ൽ പുറത്തിറങ്ങിയ ‘കണ്ണെഴുതി പൊട്ടുംതൊട്ട്’ മലയാള സിനിമയിലെ മറ്റൊരു വന്യമായ പ്രതികാര കഥയാണ്. മഞ്ജു വാര്യരുടെ കരിയറിലെ ഏറ്റവും മികച്ച പ്രകടനങ്ങളിൽ ഒന്നായി ഈ ചിത്രം വിലയിരുത്തപ്പെടുന്നു.
തന്റെ കുടുംബം നശിപ്പിച്ച നടേശൻ മുതലാളിയോടും (തിലകൻ) അയാളുടെ മകൻ ഉത്തമനോടും (ബിജു മേനോൻ) പകരം വീട്ടാൻ എത്തുന്ന ഭദ്ര എന്ന പെൺകുട്ടിയുടെ കഥയാണിത്. സൗന്ദര്യത്തെയും ബുദ്ധിയെയും ആയുധമാക്കി അവൾ നടത്തുന്ന പോരാട്ടം അതിശക്തമാണ്. ഒരു സ്ത്രീയുടെ പ്രതികാരം അതിന്റെ ഏറ്റവും വലിയ തീവ്രതയിൽ അവതരിപ്പിച്ചപ്പോൾ മലയാളി അന്ന് വരെ അങ്ങനെ പരിചയിച്ചിട്ടില്ലാത്ത ഒരു പ്രതികാര രീതിയാണ് മഞ്ജുവിന്റെ കഥാപാത്രം ചെയ്തത്.
ഒരു വശത്ത് നിഷ്കളങ്കമായ സൗന്ദര്യവും മറുവശത്ത് ഭയപ്പെടുത്തുന്ന പകയും ഒരേപോലെ കാണാൻ സാധിക്കുന്ന മഞ്ജുവിന്റെ ഭദ്ര തന്നെയാണ് ഈ സിനിമയുടെ നട്ടെല്ല്. തന്റെ വളരെ ചെറിയ പ്രായത്തിൽ മഞ്ജു ചെയ്ത ഈ വേഷം മലയാള സിനിമ ചരിത്രത്തിലെ തന്നെ ഏറ്റവും മികച്ച നായിക കഥാപാത്രമാണ് അവർക്ക് സമ്മാനിച്ചത്. ലേഡി സൂപ്പർ സ്റ്റാർ എന്ന നിലയിലുള്ള അവരുടെ ഉയർച്ചയും ഈ സിനിമയിലൂടെ ആയിരുന്നു. അധികാരവും കാമവും തലയ്ക്കുപിടിച്ച ഒരു വൃദ്ധനായി തിലകന്റെ നടേശൻ മുതലാളിയും അച്ഛനോളം തന്നെ ക്രൂരനായ ഉത്തമനും മികവ് കാണിച്ചപ്പോൾ മലയാളത്തിലെ ഏറ്റവും മികച്ച അഭിനേതാക്കളുടെ മത്സരഭിനയമാണ് പിന്നെ കണ്ടത്.
ചിത്രത്തിൽ മഞ്ജു വാരിയർ അഭിനയിച്ചുകൊണ്ടരുന്ന സമയത്ത് തനിക്ക് അവർ അഭിനയിക്കുന്ന സീൻ കാണണം എന്ന് പറഞ്ഞ് തിലകൻ നോക്കി നിന്നത് ഈ സിനിമയിലാണ്. അത്രത്തോളം മികവായിരുന്നു മഞ്ജു ഭദ്രയുടെ ഭാവങ്ങൾ പ്രകടിപ്പിച്ചത്.
