കടുത്ത സാമ്പത്തിക പ്രതിസന്ധിയിലും ആഭ്യന്തര കലാപങ്ങളിലും ഉലയുന്ന പാകിസ്താനിൽ നിന്ന് ജനാധിപത്യ സംവിധാനങ്ങളെ പൂർണ്ണമായി ലജ്ജിപ്പിക്കുന്ന വിചിത്രമായ ഒരു വാർത്ത കൂടി പുറത്തുവരുന്നു. രാജ്യത്ത് ക്രമാതീതമായി വർദ്ധിച്ചുവരുന്ന ജനസംഖ്യ നിയന്ത്രിക്കുന്നതിനായി പ്രധാനമന്ത്രി ഷെഹ്ബാസ് ഷെരീഫ് രൂപീകരിച്ച അതീവ ഉന്നതതല സമിതിയിൽ പാക് സൈന്യാധിപൻ ഫീൽഡ് മാർഷൽ അസിം മുനീറിനെയും ഉൾപ്പെടുത്തിയിരിക്കുന്നു. പ്രതിരോധം, വിദേശകാര്യം, സമ്പദ്‌വ്യവസ്ഥ എന്നിവയ്ക്ക് പിന്നാലെ ഇപ്പോൾ ജനസംഖ്യാ വിസ്ഫോടനം തടയാനുള്ള ചുമതലയും പാക് സൈനിക മേധാവിക്ക് നേരിട്ട് നൽകിയ വിവരം പാകിസ്താൻ ആരോഗ്യ മന്ത്രി സയ്യിദ് മുസ്തഫ കമാലാണ് പാർലമെന്റിൽ ഔദ്യോഗികമായി സ്ഥിരീകരിച്ചത്. ഇതോടെ ജനാധിപത്യപരമായി തിരഞ്ഞെടുക്കപ്പെട്ട ഒരു സർക്കാർ വെറും നോക്കുകുത്തിയാണെന്നും, പാകിസ്താനിലെ എല്ലാ കാര്യങ്ങളും നിയന്ത്രിക്കുന്നത് അവിടുത്തെ മിലിട്ടറി എസ്റ്റാബ്ലിഷ്‌മെന്റ് മാത്രമാണെന്നുമുള്ള യാഥാർത്ഥ്യം ഒരിക്കൽക്കൂടി ലോകത്തിന് മുന്നിൽ തുറന്നു കാട്ടപ്പെട്ടിരിക്കുകയാണ്.
കഴിഞ്ഞ കുറച്ചുകാലമായി പാകിസ്താന്റെ നയരൂപീകരണങ്ങളിൽ സൈന്യത്തിന്റെ പങ്ക് അഭൂതപൂർവമായ രീതിയിലാണ് വർദ്ധിച്ചുകൊണ്ടിരിക്കുന്നത്. 2022-ൽ ജനറലായി സൈന്യത്തിന്റെ തലപ്പത്തെത്തിയ അസിം മുനീർ, 2025-ലെ ഭാരതവുമായുള്ള കടുത്ത സൈനിക സംഘർഷത്തിന് പിന്നാലെയാണ് സ്വയം ‘ഫീൽഡ് മാർഷൽ’ പദവിയിലേക്ക് ഉയർത്തിയത്. തുടർന്ന് പാകിസ്താന്റെ ചരിത്രത്തിലാദ്യമായി ‘ചീഫ് ഓഫ് ഡിഫൻസ് ഫോഴ്‌സസ്’ (CDF) എന്ന പുതിയ പദവി സൃഷ്ടിച്ച് മൂന്ന് സേനാവിഭാഗങ്ങളുടെയും സമ്പൂർണ്ണ നിയന്ത്രണവും അദ്ദേഹം സ്വന്തമാക്കി. വിദേശ നിക്ഷേപങ്ങൾ ആകർഷിക്കാനായി രൂപീകരിച്ച സ്പെഷ്യൽ ഇൻവെസ്റ്റ്‌മെന്റ് ഫെസിലിറ്റേഷൻ കൗൺസിലിലും (SIFC) നിലവിൽ മുനീർ അംഗമാണ്. അമേരിക്കയും ഇറാനും തമ്മിലുള്ള സംഘർഷങ്ങളിൽ പാകിസ്താൻ മധ്യസ്ഥനായി ചമഞ്ഞപ്പോൾ ഡൊണാൾഡ് ട്രംപ് പോലും മുനീറിനെ തന്റെ “പ്രിയപ്പെട്ട ഫീൽഡ് മാർഷൽ” എന്ന് വിശേഷിപ്പിച്ചിരുന്നു. എന്നാൽ അന്താരാഷ്ട്ര തലത്തിൽ ഇത്തരം വലിയ നാടകങ്ങൾ കളിക്കുന്ന ഫീൽഡ് മാർഷലിന് ഇപ്പോൾ സ്വന്തം രാജ്യത്തെ ജനങ്ങളുടെ ജനന നിരക്ക് കുറയ്ക്കാൻ റൂട്ട് മാപ്പ് തയ്യാറാക്കേണ്ട ഗതികേടാണ് വന്നിരിക്കുന്നത്.
നിലവിൽ 25.9 കോടിയിലധികം ജനസംഖ്യയുള്ള പാകിസ്താൻ ലോകത്തിൽ ഏറ്റവും കൂടുതൽ ജനങ്ങളുള്ള അഞ്ചാമത്തെ രാജ്യമാണ്. പാകിസ്താന്റെ വാർഷിക ജനസംഖ്യാ വളർച്ചാ നിരക്ക് 2.55 ശതമാനമാണ്. ഓരോ വർഷവും ഏതാണ്ട് 67 ലക്ഷം കുട്ടികളാണ് പാകിസ്താനിൽ ജനിക്കുന്നത്. ഈ പോക്ക് തുടർന്നാൽ 2030-ഓടെ ഇന്തോനേഷ്യയെപ്പോലും മറികടന്ന് പാകിസ്താൻ ലോകത്തിലെ നാലാമത്തെ വലിയ ജനസംഖ്യാ രാജ്യമായി മാറും. ഐ.എം.എഫിന്റെ (IMF) ഭിക്ഷാടന വായ്പകൾ കൊണ്ടും മറ്റ് അറബ് രാജ്യങ്ങളുടെ ഔദാര്യം കൊണ്ടും കഷ്ടിച്ച് ശ്വാസം വിടുന്ന പാകിസ്താന് ഈ ജനസംഖ്യാ സ്ഫോടനം ഒരു വലിയ ദുരന്തമാണ് സമ്മാനിക്കുന്നത്. കോണ്ടം ഉൾപ്പെടെയുള്ള ഗർഭനിരോധന മാർഗ്ഗങ്ങൾക്ക് നികുതി ഇളവ് നൽകിയും മറ്റും ജനസംഖ്യ കുറയ്ക്കാനാണ് പാക് ആരോഗ്യ മന്ത്രാലയം ഇപ്പോൾ നോക്കുന്നത്.
ഇതിനിടയിലാണ് ഷെഹ്ബാസ് ഷെരീഫ് തന്റെ കോൺടാക്ട് ലിസ്റ്റിലെ ആദ്യത്തെ പേരായ അസിം മുനീറിനെ വിളിച്ച് ഈ ദൗത്യം ഏൽപ്പിച്ചിരിക്കുന്നത്. ഭാരതത്തിനെതിരെയുള്ള അതിർത്തി കടന്നുള്ള ഭീകരവാദത്തെ പ്രോത്സാഹിപ്പിക്കാനും ഭാരതവിരുദ്ധ പ്രസ്താവനകൾ ഇറക്കാനും സമയം കണ്ടെത്തുന്ന പാക് സൈനിക നേതൃത്വം സ്വന്തം അതിർത്തികൾ സംരക്ഷിക്കാൻ പോലും കഴിയാതെ പരാജയപ്പെടുന്ന കാഴ്ചയാണ് നിലവിലുള്ളത്. കഴിഞ്ഞ ദിവസം ബലൂചിസ്താനിലും അഫ്ഗാൻ അതിർത്തിയിലുമായി ഉണ്ടായ കനത്ത ആക്രമണങ്ങളിൽ 42 പാക് സൈനികരാണ് ബലൂച് വിമതരാലും ടി.ടി.പി ഭീകരരാലും കൊല്ലപ്പെട്ടത്. കൂടാതെ പാക് അധീന കശ്മീരിൽ (PoK) സാമ്പത്തിക പട്ടിണിക്കെതിരെ ജനങ്ങൾ തെരുവിലിറങ്ങി സൈന്യത്തിന് നേരെ കല്ലെറിയുകയാണ്. അതിർത്തിയിലെ സുരക്ഷ ഉറപ്പാക്കാൻ പോലും സാധിക്കാത്ത പാക് സൈന്യാധിപനെ ജനസംഖ്യാ ബോധവൽക്കരണത്തിന് നിയോഗിച്ചതിനെതിരെ പാകിസ്താനിലെ ജനങ്ങളും മാധ്യമപ്രവർത്തകരും സോഷ്യൽ മീഡിയയിൽ കടുത്ത പരിഹാസമാണ് ഉയർത്തുന്നത്. കശ്മീരിലും ബലൂചിസ്താനിലും സ്വന്തം ജനങ്ങളെ കൊന്നൊടുക്കി ‘ജനസംഖ്യ വിജയകരമായി കുറച്ച’ പരിചയ സമ്പന്നനാണ് ഫീൽഡ് മാർഷൽ അസിം മുനീർ എന്ന രീതിയിലുള്ള ട്രോളുകളാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്. ഭാരതത്തിന്റെ അഖണ്ഡതയ്‌ക്കെതിരെ എപ്പോഴും പല്ലിളിക്കുന്ന ഒരു ശത്രുരാജ്യം സ്വന്തം ജനസംഖ്യ നിയന്ത്രിക്കാൻ പോലും പട്ടാളത്തിന്റെ തോക്കിൻമുനയെ ആശ്രയിക്കേണ്ടി വരുന്ന വലിയൊരു തകർച്ചയിലേക്കാണ് നീങ്ങിക്കൊണ്ടിരിക്കുന്നത്.
