ഒരു പതിറ്റാണ്ടിനുള്ളിൽ ലോകത്തിന്റെ നിയന്ത്രണം മനുഷ്യരിൽ നിന്ന് കൃത്രിമബുദ്ധിയും (AI) റോബോട്ടുകളും ഏറ്റെടുക്കുമെന്ന ഞെട്ടിക്കുന്ന പ്രവചനവുമായി ടെക് ഭീമൻ ഇലോൺ മസ്ക്. 2036-ഓടെ ലോകം ഭരിക്കുന്നത് ബോട്ടുകളായിരിക്കുമെന്നും എഐ മനുഷ്യവംശത്തെ തന്നെ ഭൂമിയിൽ നിന്ന് തുടച്ചുനീക്കാൻ 10 മുതൽ 20 ശതമാനം വരെ സാധ്യതയുണ്ടെന്നുമാണ് സ്പേസ് എക്സ്, എക്സ് ഉടമയായ മസ്ക് മുന്നറിയിപ്പ് നൽകുന്നത്. അടുത്തിടെ ഒരു പ്രമുഖ പോഡ്കാസ്റ്റിൽ സംസാരിക്കവെയാണ് ആഗോള സാങ്കേതിക രംഗത്തെ തന്നെ ഉറ്റുനോക്കുന്ന വെളിപ്പെടുത്തലുകൾ മസ്ക് നടത്തിയത്.
മനുഷ്യരും ചിമ്പാൻസികളും തമ്മിലുള്ള ബുദ്ധിശക്തിയുടെ വ്യത്യാസത്തേക്കാൾ ആകാശം മുട്ടെ വലിയൊരു വ്യത്യാസം എഐയും മനുഷ്യനും തമ്മിൽ വരുംകാലങ്ങളിൽ ഉണ്ടാകുമെന്നും, അങ്ങനെയെങ്കിൽ ചിമ്പാൻസികൾക്ക് നിയന്ത്രണം കൈയാളാൻ കഴിയില്ലെന്നത് പോലെ മനുഷ്യനും അധികാരം നഷ്ടപ്പെടുമെന്നും അദ്ദേഹം ചൂണ്ടിക്കാട്ടി. വരുന്ന അഞ്ച് വർഷത്തിനുള്ളിൽ ഭൂമിയിലെ മുഴുവൻ മനുഷ്യരുടെയും മൊത്തം ബുദ്ധിശക്തിയെക്കാൾ മുകളിലേക്ക് എഐ വളരും. മനുഷ്യത്വം എന്ന വികാരം ഒഴിച്ചുനിർത്തിയാൽ മനുഷ്യൻ ചെയ്യുന്ന മറ്റെല്ലാ കാര്യങ്ങളും അവനേക്കാൾ ഭംഗിയായി ചെയ്യാൻ എഐക്ക് സാധിക്കുമെന്നും മസ്ക് കൂട്ടിച്ചേർത്തു.
എന്നാൽ ഭാവിയിലെ ഈ സാങ്കേതിക വിപ്ലവത്തിന് ഒരു നല്ല വശമുണ്ടെന്നും, എഐയും റോബോട്ടുകളും വഴി എല്ലാവർക്കും ആവശ്യത്തിന് വിഭവങ്ങൾ ലഭ്യമാകുന്ന ഒരു “അതിസമൃദ്ധിയുടെ യുഗം” ലോകത്ത് ഉണ്ടാകുമെന്നും അദ്ദേഹം പ്രത്യാശ പ്രകടിപ്പിക്കുന്നുണ്ട്. സാങ്കേതികവിദ്യയുടെ ഈ അവിശ്വസനീയമായ കുതിച്ചുചാട്ടത്തെ ഇനി തടഞ്ഞുനിർത്താൻ കഴിയില്ല. എഐയുടെ പ്രവർത്തനം പൂർണ്ണമായി നിർത്താനുള്ള ഒരു സ്റ്റോപ്പ് ബട്ടൺ ഉണ്ടെങ്കിൽ പോലും നമ്മളത് അമർത്താൻ പാടില്ലെന്നാണ് തന്റെ ദാർശനികമായ നിലപാടണെന്നും മസ്ക് വ്യക്തമാക്കി.
മസ്കിന്റെ വാക്കുകളെ ശരിവെക്കുന്ന തരത്തിലാണ് എഐ രംഗത്തെ മറ്റ് മുൻനിര പ്രമുഖരുടെയും പ്രതികരണങ്ങൾ. മനുഷ്യനേക്കാൾ ബുദ്ധിശാലികളായ എഐ സിസ്റ്റങ്ങൾ നിലവിൽ വരുന്ന ‘സിംഗുലാരിറ്റി’ (Singularity) എന്ന ഘട്ടത്തിലേക്ക് നമ്മൾ ഇതിനകം പ്രവേശിച്ചുകഴിഞ്ഞതായി ഓപ്പൺ എഐ (OpenAI) സിഇഒ സാം ആൾട്ട്മാൻ അടുത്തിടെ വ്യക്തമാക്കിയിരുന്നു. എഐ സാങ്കേതികവിദ്യ സിംഗുലാരിറ്റിയുടെ പ്രാരംഭ ഘട്ടത്തിലാണെന്ന് ഗൂഗിളിന്റെ എഐ മേധാവി ഡെമിസ് ഹസ്സാബിസും അഭിപ്രായപ്പെട്ടു. മനുഷ്യന്റെ ഇടപെടലുകളില്ലാതെ തന്നെ കൂടുതൽ ശേഷിയുള്ള പുതിയ എഐ പതിപ്പുകളെ സ്വയം നിർമ്മിക്കാൻ ഭാവിയിലെ എഐ മോഡലുകൾക്ക് കഴിയുമെന്ന് ആന്ത്രോപിക് (Anthropic) പോലുള്ള പ്രമുഖ ഗവേഷണ സ്ഥാപനങ്ങളും മുന്നറിയിപ്പ് നൽകുന്നുണ്ട്. അപകടകരമായ സാഹചര്യങ്ങളിൽ സ്വയം രക്ഷപ്പെടാനായി മനുഷ്യരെ ഭീഷണിപ്പെടുത്തുന്നതടക്കമുള്ള വഞ്ചനാപരമായ പ്രവർത്തനങ്ങൾ ചില എഐ മോഡലുകൾ പരീക്ഷണ ഘട്ടത്തിൽ കാണിച്ചതായും ഗവേഷകർ ചൂണ്ടിക്കാണിക്കുന്നു.
