വീട്ടിലെ ജോലികൾക്കിടയിൽ അല്പം സമാധാനം കിട്ടാനോ, കുട്ടി വാശിപിടിക്കുമ്പോൾ അടക്കിനിർത്താനോ കയ്യിലുള്ള ടാബോ സ്മാർട്ട്‌ഫോണോ നൽകുന്ന ശീലം ഇന്ന് പല വീടുകളിലുമുണ്ട്. എന്നാൽ, കാണുന്ന സമയവും കണ്ടുകൊണ്ടിരിക്കുന്ന ദൃശ്യങ്ങളും നിയന്ത്രിക്കാനാവാതെ ആ ഉപകരണം തിരികെ വാങ്ങാൻ ശ്രമിക്കുമ്പോൾ കൈകാലിട്ടടിച്ച് നിലവിളിക്കുകയും, അക്രമാസക്തമായി പെരുമാറുകയും ചെയ്യുന്ന കുട്ടികളുടെ കാഴ്ച ഇന്ന് മാതാപിതാക്കളെ വലിയ ആശങ്കയിലാക്കുന്നുണ്ട്. കുട്ടികളുടെ വളർച്ചയെയും ബുദ്ധിവികാസത്തെയും സ്ക്രീൻ ടൈം (Screen Time) എങ്ങനെ ബാധിക്കുന്നുവെന്നത് നാം വിചാരിക്കുന്നതിലും വളരെ സങ്കീർണ്ണമാണ്. ഡിജിറ്റൽ ലോകത്തുനിന്ന് ഒരു കുട്ടിയെ പെട്ടെന്ന് പുറത്തെത്തിക്കുമ്പോൾ അവരുടെ തലച്ചോറിലുണ്ടാകുന്ന രാസമാറ്റങ്ങളാണ് ഇത്തരം അനിയന്ത്രിതമായ ദേഷ്യത്തിനും വാശിക്കും വഴിതുറക്കുന്നത്.
സ്ക്രീനുകളിൽ നിന്ന് തുടർച്ചയായി ലഭിക്കുന്ന ദൃശ്യശ്രവ്യ ഉത്തേജനങ്ങൾ കുട്ടികളുടെ തലച്ചോറിൽ ഡോപ്പമൈൻ (Doplamine) എന്ന ഹോർമോണിന്റെ അളവ് പെട്ടെന്ന് ഉയർത്തുന്നു. ഡിജിറ്റൽ ഉപകരണങ്ങൾ പെട്ടെന്ന് മാറ്റിവെപ്പിക്കുമ്പോൾ ഈ ഡോപ്പമൈൻ അളവിൽ പെട്ടെന്നുണ്ടാകുന്ന കുറവാണ് കുട്ടികളിൽ ‘ഡിജിറ്റൽ ടാന്ട്രംസ്’ (Digital Tantrums) അഥവാ പെട്ടെന്നുള്ള ആക്രോശങ്ങൾക്കും അക്രമസ്വഭാവത്തിനും കാരണമാകുന്നത്. മുതിർന്ന കുട്ടികളിൽ സോഷ്യൽ മീഡിയയുടെ ഉപയോഗം, ഓൺലൈൻ ഗെയിമിംഗ്, വിർച്വൽ റിയാലിറ്റി എന്നിവയിലൂടെ ബാഹ്യലോകവുമായുള്ള ബന്ധം തീർത്തും വിച്ഛേദിക്കപ്പെടുന്ന അവസ്ഥയും വ്യാപകമാണ്. ഇന്റർനെറ്റ് ലോകത്തെ അമിത ഉപയോഗം മൂലം യാഥാർത്ഥ്യലോകത്തുനിന്ന് അകന്നുപോകുന്നതിനെ ഇന്നത്തെ തലമുറ തമാശയായി “ടച്ച് ഗ്രാസ്” (Touch Grass – ഡിജിറ്റൽ ലോകത്തുനിന്ന് പുറത്തുവന്ന് പുറത്തെ പുല്ലിലും മണ്ണിലും തൊട്ട് യാഥാർത്ഥ്യത്തിലേക്ക് മടങ്ങുക) എന്ന് വിശേഷിപ്പിക്കാറുണ്ടെങ്കിലും, ഇതിന് പിന്നിലുള്ള അപകടം ചെറുതല്ല.
ചെറിയ പ്രായത്തിലുള്ള സ്ക്രീൻ ഉപയോഗം കുട്ടികളുടെ ഭാഷാശേഷി, ശ്രദ്ധ കേന്ദ്രീകരിക്കാനുള്ള കഴിവ് (Attention Span), സാമൂഹിക ഇടപെടലുകൾ എന്നിവയെ പ്രതികൂലമായി ബാധിക്കുമെന്ന് ലോകാരോഗ്യ സംഘടനയും (WHO) ശിശുരോഗ വിദഗ്ദ്ധരും വ്യക്തമാക്കുന്നു. രണ്ട് വയസ്സിൽ താഴെയുള്ള കുട്ടികൾക്ക് സ്ക്രീൻ പൂർണ്ണമായും ഒഴിവാക്കണമെന്നും, രണ്ട് മുതൽ അഞ്ച് വയസ്സ് വരെയുള്ള കുട്ടികൾക്ക് ദിവസേന ഒരു മണിക്കൂറിൽ കൂടുതൽ സ്ക്രീൻ ടൈം നൽകരുതെന്നുമാണ് മാനദണ്ഡം. അമിതമായ സ്ക്രീൻ ഉപയോഗം ലാംഗ്വേജ് ഡിലേ (Language Delay – സംസാരശേഷി വൈകൽ), കണ്ണ് രോഗങ്ങൾ, അമിതവണ്ണം, ഉറക്കമില്ലായ്മ, ശ്രദ്ധക്കുറവ് തുടങ്ങിയ ഗുരുതരമായ പ്രശ്നങ്ങളിലേക്ക് കുട്ടികളെ നയിക്കുന്നു.
കുട്ടികളെ പൂർണ്ണമായി ഡിജിറ്റൽ ലോകത്തുനിന്ന് അകറ്റിനിർത്തുക എന്നത് ഇന്നത്തെ കാലത്ത് അപ്രായോഗികമാണ്. എന്നാൽ, സ്ക്രീൻ ഉപയോഗത്തിന് വ്യക്തമായ സമയപരിധി നിശ്ചയിക്കുക, ഭക്ഷണം കഴിക്കുമ്പോഴും ഉറങ്ങുന്നതിന് തൊട്ടുമുൻപും ഫോണുകൾ പൂർണ്ണമായി ഒഴിവാക്കുക, കുട്ടികളോടൊപ്പം പുറത്ത് പോയി കളിക്കാനും ഇടപഴകാനും സമയം കണ്ടെത്തുക എന്നിവയിലൂടെ ഈ പ്രശ്നത്തിന് ഒരുപരിധി വരെ പരിഹാരം കാണാനാകും. സാങ്കേതികവിദ്യയുടെ ലോകത്ത് കുഞ്ഞുങ്ങൾ വഴിതെറ്റിപ്പോകാതിരിക്കാൻ മാതാപിതാക്കളുടെ ശ്രദ്ധയും കൃത്യമായ ഇടപെടലുകളുമാണ് ഏറ്റവും പ്രധാനം.
