ദിസ്പുർ : അസമിൽ റൈജോർ ദൾ പാർട്ടിയുമായുള്ള രാഷ്ട്രീയ സഖ്യം അവസാനിപ്പിച്ച് കോൺഗ്രസ്. റൈജോർ ദൾ അധ്യക്ഷനും എംഎൽഎയുമായ അഖിൽ ഗൊഗോയിയും പാർട്ടി നേതൃത്വവും സഖ്യധർമ്മം ലംഘിച്ച് കോൺഗ്രസിനും പ്രതിപക്ഷ നേതാക്കൾക്കുമെതിരെ നിരന്തരം വ്യക്തിഹത്യയും വ്യാജപ്രചാരണങ്ങളും നടത്തുന്നു എന്ന് ചൂണ്ടിക്കാണിച്ചാണ് മുൻകൈയെടുത്ത് രൂപീകരിച്ച സഖ്യബന്ധം കോൺഗ്രസ് ഔദ്യോഗികമായി ഉപേക്ഷിച്ചത്. അസം പ്രദേശ് കോൺഗ്രസ് കമ്മിറ്റി (എപിസിസി) അധ്യക്ഷനും ലോകസഭയിലെ ഉപനേതാവുമായ ഗൗരവ് ഗൊഗോയിയുടെ നിർദ്ദേശപ്രകാരമാണ് ഈ തീരുമാനം ഉടനടി പ്രാബല്യത്തിൽ വരുത്തിക്കൊണ്ട് പാർട്ടി ജനറൽ സെക്രട്ടറി രാമണ്ണ ബറുവ ഉത്തരവിറക്കിയത്.
വർഗീയ ശക്തികൾക്കെതിരെ ഒരുമിച്ച് പോരാടാനും കരുത്തുറ്റ പ്രതിപക്ഷം കെട്ടിപ്പടുക്കാനുമാണ് പ്രാദേശിക-ഇടതുപക്ഷ പാർട്ടികളെ ഒന്നിപ്പിച്ച് മുൻ തിരഞ്ഞെടുപ്പുകളിൽ കോൺഗ്രസ് സഖ്യം രൂപീകരിച്ചത്. എന്നാൽ സഖ്യത്തിൽ തുടരുമ്പോഴും റൈജോർ ദൾ നേതൃത്വം കോൺഗ്രസ് നേതാക്കളെയും മറ്റ് പ്രതിപക്ഷ കക്ഷികളെയും മോശക്കാരാക്കി ചിത്രീകരിക്കാനാണ് ശ്രമിച്ചതെന്ന് എപിസിസി ആരോപിച്ചു. കഴിഞ്ഞ ദിവസങ്ങളിൽ നടത്തിയ വാർത്താസമ്മേളനത്തിൽ അഖിൽ ഗൊഗോയ് സർക്കാരിന്റെ ഏജന്റായി പ്രവർത്തിക്കുകയാണെന്നും ശിവസാഗർ മണ്ഡലത്തിൽ കോൺഗ്രസിന്റെ പൂർണ്ണ പിന്തുണയുള്ളതുകൊണ്ട് മാത്രമാണ് അദ്ദേഹം വിജയിച്ചതെന്നും കോൺഗ്രസ് തുറന്നടിച്ചു.
റൈജോർ ദളുമായുള്ള ബന്ധം വിച്ഛേദിച്ചെങ്കിലും ജനകീയ വിഷയങ്ങളിൽ ഭരണകക്ഷിയായ ബിജെപിക്കെതിരെ ശക്തമായി പോരാടുന്നത് തുടരുമെന്ന് കോൺഗ്രസ് വ്യക്തമാക്കി. ബിജെപി സർക്കാരിന്റെ നയങ്ങൾക്കും ഭരണപരാജയങ്ങൾക്കുമെതിരെ ഒറ്റയ്ക്കോ മറ്റ് സമാന ചിന്താഗതിയുള്ള പ്രതിപക്ഷ കക്ഷികളുമായോ ചേർന്ന് പ്രക്ഷോഭങ്ങൾ സംഘടിപ്പിക്കും. അതേസമയം, 126 അംഗ അസം നിയമസഭയിൽ ബിജെപിക്ക് കേവല ഭൂരിപക്ഷമുള്ളപ്പോൾ, കോൺഗ്രസിന് 19 ഉം റൈജോർ ദളിന് 2 ഉം സീറ്റുകളാണുള്ളത്. സഖ്യം തകർന്നതോടെ വരും ദിവസങ്ങളിൽ അസം രാഷ്ട്രീയത്തിൽ വലിയ മാറ്റങ്ങൾക്ക് വഴിയൊരുങ്ങിയേക്കും.
