സിംഗപ്പൂർ രാഷ്ട്രീയ നേതാക്കളുടെ ശമ്പളം വർദ്ധിപ്പിക്കാൻ തീരുമാനിച്ചതിന്റെ ഭാഗമായി പ്രധാനമന്ത്രി ലോറൻസ് വോങ്ങിന്റെ വാർഷിക ശമ്പളം 1.7 ദശലക്ഷം ഡോളറിൽ നിന്ന് 2.8 ദശലക്ഷം ഡോളറായി ഉയർത്തി. ചൊവ്വാഴ്ച പാർലമെന്റിൽ നടത്തിയ പ്രഖ്യാപനത്തിലാണ് അദ്ദേഹം ഇക്കാര്യം വ്യക്തമാക്കിയത്. കഴിവുറ്റ രാഷ്ട്രീയ നേതാക്കളെ ആകർഷിക്കുന്നതിനും മികച്ച ഭരണം നിലനിർത്തുന്നതിനും ശമ്പള വർദ്ധനവ് അത്യന്താണെന്ന് വോങ് പറഞ്ഞു. പുതിയ തീരുമാനപ്രകാരം ഉപപ്രധാനമന്ത്രിയുടെ വാർഷിക ശമ്പളം 1.48 ദശലക്ഷം ഡോളറിൽ നിന്ന് 2.42 ദശലക്ഷം ഡോളറായി ഉയരും. കാബിനറ്റ് മന്ത്രിമാരുടെ ശമ്പളം അവരുടെ സീനിയോറിറ്റിയും വകുപ്പുകളുടെ ചുമതലയും അനുസരിച്ച് 1.42 ദശലക്ഷം ഡോളറിനും 2.28 ദശലക്ഷം ഡോളറിനും ഇടയിലായിരിക്കും.
എന്നാൽ തന്റെ ശമ്പളത്തിൽ വർദ്ധനവായി ലഭിക്കുന്ന മുഴുവൻ തുകയും നല്ല കാര്യങ്ങൾക്കായി സംഭാവന ചെയ്യുമെന്ന് ലോറൻസ് വോങ് വ്യക്തമാക്കിയിട്ടുണ്ട്. രാഷ്ട്രീയ നേതാക്കളുടെ ഉയർന്ന ശമ്പളം സിംഗപ്പൂരിൽ ദീർഘകാലമായി നിലനിൽക്കുന്ന ഒന്നാണെങ്കിലും, സാധാരണക്കാരുടെ വരുമാനത്തേക്കാൾ വളരെ കൂടുതലായതിനാൽ ഇത് രാഷ്ട്രീയമായി ഏറെ ചർച്ച ചെയ്യപ്പെടുന്ന ഒരു വിഷയമാണ്. തുക വളരെ വലുതാണെന്നും പൗരന്മാർ ഇതിനെ സൂക്ഷ്മമായി നിരീക്ഷിക്കുന്നത് എന്തുകൊാണെന്ന് തനിക്ക് മനസ്സിലാകുന്നുണ്ടെന്നും അദ്ദേഹം സമ്മതിച്ചു. എങ്കിലും രാജ്യത്തെ മുന്നോട്ട് നയിക്കാൻ യോഗ്യരായ രാഷ്ട്രീയ നേതൃത്വം ആവശ്യമാണെന്നും അതിനാണ് പ്രാധാന്യം നൽകുന്നതെന്നും അദ്ദേഹം കൂട്ടിച്ചേർത്തു.
ഈ വർദ്ധനവിന് മുമ്പ് തന്നെ ലോകത്തിൽ ഏറ്റവും കൂടുതൽ ശമ്പളം വാങ്ങുന്ന രാഷ്ട്രീയ നേതാക്കളിൽ ഒരാളായിരുന്നു സിംഗപ്പൂർ പ്രധാനമന്ത്രി. സ്വതന്ത്രമായ ഒരു സമിതിയുടെ ശുപാർശയുടെ അടിസ്ഥാനത്തിലാണ് ഈ ശമ്പള വർദ്ധനവ് നടപ്പിലാക്കിയിരിക്കുന്നത്. നിലവിലുള്ള ഓഫീസ് ഹോൾഡർമാർക്ക് പുതിയ ശമ്പള സ്കെയിൽ ഉടൻ ബാധകമാകില്ല. പകരം വ്യക്തിഗത പ്രകടനത്തിന്റെയും സാഹചര്യങ്ങളുടെയും അടിസ്ഥാനത്തിൽ ഒക്ടോബർ 15 മുതൽ ഒൻപത് ശതമാനം വരെ ഒറ്റത്തവണത്തെ വർദ്ധനവായിരിക്കും ഇവർക്ക് ലഭിക്കുക.
