ഈഴവരുടെ ഹൃദയത്തിൽ ബ്രാഹ്മണമഹിമയുണ്ടെന്നും അതുകൊണ്ടാണ് അവർ പൂണൂൽ ധരിച്ച് പൂജ നടത്തുന്നതെന്നും മുൻ മന്ത്രിയും മുതിർന്ന സി.പി.എം നേതാവുമായ ജി. സുധാകരൻ. കേരള ബ്രാഹ്മണസഭ സംഘടിപ്പിച്ച ‘കലാഞ്ജലി 2026’ സംസ്ഥാന കലോത്സവത്തിന്റെ ഉദ്ഘാടന ചടങ്ങിൽ സംസാരിക്കവെയായിരുന്നു അദ്ദേഹത്തിന്റെ വേറിട്ട പരാമർശം. ജി. സുധാകരന്റെ പ്രസ്താവന സോഷ്യൽ മീഡിയയിലും രാഷ്ട്രീയ വൃത്തങ്ങളിലും ഇതിനോടകം വലിയ ചർച്ചയായിക്കഴിഞ്ഞു.
ബ്രാഹ്മണ സംസ്കാരം ഹൃദയത്തിൽ കൊണ്ടുനടക്കുന്ന ബ്രാഹ്മണരല്ലാത്ത വലിയൊരു വിഭാഗം ജനങ്ങൾ കേരളത്തിലുണ്ടെന്ന് അദ്ദേഹം അഭിപ്രായപ്പെട്ടു. ഇതിന് ഉദാഹരണമായി കേരളത്തിൽ ജനസംഖ്യയുടെ 33 ശതമാനത്തോളമുള്ള ഈഴവ സമുദായത്തെയാണ് അദ്ദേഹം ചൂണ്ടിക്കാണിച്ചത്. ഈഴവരുടെ ചില ക്ഷേത്രങ്ങളിൽ പൂണൂൽ ധരിച്ചാണ് പൂജ നടത്തുന്നത്. ബ്രാഹ്മണമഹിമ ഹൃദയത്തിലുള്ളതുകൊണ്ടാണ് അവർ അങ്ങനെ ചെയ്യുന്നത്. അങ്ങനെ പൂജിച്ചാലേ ശരിയാകൂ എന്ന് അവർ വിശ്വസിക്കുന്നുണ്ടെന്നും ജി. സുധാകരൻ കൂട്ടിച്ചേർത്തു.
ബ്രാഹ്മണ സമൂഹത്തിൽ മുൻകാലങ്ങളിൽ നിലനിന്നിരുന്ന ഉച്ചനീചത്വങ്ങളെയും അനാചാരങ്ങളെയുമാണ് ഇ.എം.എസ്. നമ്പൂതിരിപ്പാടും വി.ടി. ഭട്ടതിരിപ്പാടും എതിർത്തതെന്ന് അദ്ദേഹം ഓർമ്മിപ്പിച്ചു. വി.ടി. ഭട്ടതിരിപ്പാട് സ്ത്രീകൾക്ക് സ്വാതന്ത്ര്യം നൽകി അടുക്കളയിൽ നിന്ന് അരങ്ങത്തേക്ക് വരാൻ ആഹ്വാനം ചെയ്തതും അനാചാരങ്ങൾക്കെതിരെ പോരാടിയതുമെല്ലാം സ്വന്തം സമുദായത്തിലെ നന്മയ്ക്ക വേണ്ടിയായിരുന്നു. എന്നാൽ ഭരണഘടനയും നിയമങ്ങളും നിലവിൽ വന്നതോടെ ബ്രാഹ്മണ സമൂഹത്തിന്റെ മുൻകാല അവകാശങ്ങളിൽ പലതും നഷ്ടപ്പെട്ടു. നിലവിൽ ആ സമൂഹത്തിലെ വലിയൊരു വിഭാഗം ജനങ്ങൾ സാമ്പത്തിക പ്രയാസത്തിലും കഷ്ടപ്പാടിലുമാണ് കഴിയുന്നത്. അതിനാൽ ബ്രാഹ്മണ സമൂഹത്തിൽ ദാരിദ്ര്യരേഖയ്ക്ക് താഴെയുള്ളവർക്ക് പ്രത്യേക ഗ്രാന്റ് അനുവദിക്കാൻ കേന്ദ്ര-സംസ്ഥാന സർക്കാരുകൾ തയ്യാറാകണമെന്നും ജി. സുധാകരൻ ചടങ്ങിൽ ആവശ്യപ്പെട്ടു.
