ചെന്നൈ സൂപ്പർ കിംഗ്സിന്റെ പുതിയ മുഖ്യ പരിശീലകനായി സഹീർ ഖാൻ എത്തിയതിന് പിന്നാലെ ടീമിന്റെ നായകസ്ഥാനത്ത് നിർണായക മാറ്റങ്ങൾ ഉണ്ടായേക്കുമെന്ന സൂചനയുമായി രവിചന്ദ്രൻ അശ്വിൻ. അടുത്ത ഐ.പി.എൽ സീസണിൽ ഋതുരാജ് ഗെയ്ക്‌വാദിന് പകരം മലയാളി താരം സഞ്ജു സാംസൺ സി.എസ്.കെയുടെ പുതിയ നായകനായി ചുമതലയേൽക്കാൻ സാധ്യതയുണ്ടെന്നാണ് അശ്വിന്റെ വെളിപ്പെടുത്തൽ. കഴിഞ്ഞ ഐ.പി.എൽ സീസണിൽ മികച്ച പ്രകടനം കാഴ്ചവെച്ച സഞ്ജു സാംസൺ 477 റൺസാണ് നേടിയത്. എന്നാൽ ഋതുരാജ് ഗെയ്ക്‌വാദിന് കഴിഞ്ഞ സീസണിൽ 24.07 ശരാശരിയിൽ 337 റൺസ് മാത്രമാണ് നേടാനായത്.
തുടർച്ചയായ മൂന്ന് സീസണുകളിൽ പ്ലേഓഫിലെത്താൻ കഴിയാത്ത സാഹചര്യത്തിൽ രുതുരാജ് നേരിടുന്ന ക്യാപ്റ്റൻസി സമ്മർദ്ദം ഒഴിവാക്കാൻ ഈ മാറ്റം സഹായിക്കുമെന്നാണ് വിലയിരുത്തപ്പെടുന്നത്. 2026-ലെ ടി20 ലോകകപ്പിൽ ഇന്ത്യക്കായി മികച്ച പ്രകടനം പുറത്തെടുത്ത സഞ്ജുവിനെ ക്യാപ്റ്റനാക്കാനുള്ള സാധ്യതകളെക്കുറിച്ച് തന്റെ യൂട്യൂബ് ചാനലിലൂടെയാണ് അശ്വിൻ സംസാരിച്ചത്.
സ്റ്റീഫൻ ഫ്ലെമിങ്ങിന്റെ പടിയിറക്കത്തിന് ശേഷം എത്തിയ സഹീർ ഖാന്റെ തന്ത്രപരമായ തീരുമാനങ്ങൾ ടീമിൽ വലിയ നേതൃമാറ്റത്തിന് വഴിയൊരുക്കുമെന്നാണ് കരുതുന്നത്. രാജസ്ഥാൻ റോയൽസിനെ നയിച്ച പരിചയസമ്പത്തുള്ള സഞ്ജു സാംസൺ നായകനായി എത്തുമ്പോൾ രുതുരാജിന് ബാറ്റിംഗിൽ കൂടുതൽ ശ്രദ്ധ കേന്ദ്രീകരിക്കാൻ സാധിക്കുമെന്നും ഇത് ടീമിന് ഗുണം ചെയ്യുമെന്നും ക്രിക്കറ്റ് നിരീക്ഷകർ കരുതുന്നു.
