ഇന്നത്തെ പോലെ അത്യാധുനിക ഉപഗ്രഹങ്ങളും ജി.പി.എസുകളും ഇല്ലാതിരുന്ന പത്തൊൻപതാം നൂറ്റാണ്ടിൽ, ലോകത്തെ മുഴുവൻ വിസ്മയിപ്പിച്ച ഒരു ദൗത്യത്തിന് ചുക്കാൻ പിടിച്ചത് ഇന്ത്യക്കാരനായിരുന്നു. വിദേശികൾക്ക് പ്രവേശനം കർശനമായി നിരോധിക്കുകയും പിടിക്കപ്പെട്ടാൽ വധശിക്ഷ വരെ ലഭിക്കുകയും ചെയ്തിരുന്ന ടിബറ്റിന്റെ ദുർഘടമായ ഭൂപ്രദേശം രഹസ്യമായി അളന്ന് ലോക ഭൂപടത്തിൽ രേഖപ്പെടുത്തിയ ധീരനായ സർവേയർ നൈൻ സിംഗ് റാവത്തിന്റെ ചരിത്രം ഏവരെയും അത്ഭുതപ്പെടുത്തുന്നതാണ്. സ്വന്തം കാലടികളെ അളവുകോലാക്കി ജപമാലയും പ്രാർത്ഥനാ ചക്രവും രഹസ്യ ഉപകരണങ്ങളാക്കിയാണ് അദ്ദേഹം ഈ വലിയ ചരിത്രനേട്ടം സ്വന്തമാക്കിയത്.
1830-ൽ ഇന്നത്തെ ഉത്തരാഖണ്ഡിലെ കുമാവോൺ ഹിമാലയ മേഖലയിലെ മിലം ഗ്രാമത്തിലാണ് നൈൻ സിംഗ് റാവത്ത് ജനിച്ചത്. അക്കാലത്ത് ടിബറ്റിലേക്ക് കടക്കുന്ന യൂറോപ്യൻ സഞ്ചാരികൾക്ക് തടവോ വധശിക്ഷയോ ആയിരുന്നു ശിക്ഷ. ഈ പ്രതിസന്ധിക്ക് പരിഹാരമായിട്ടാണ് പ്രദേശത്തെ ഭാഷയും സംസ്കാരവും വശമുള്ള മലയോര സ്വദേശികളെ പരിശീലിപ്പിച്ച് രഹസ്യ സർവേ നടത്താൻ ബ്രിട്ടീഷ് ഭരണകൂടം തീരുമാനിച്ചത്. ഈ ദൗത്യത്തിൽ തിളങ്ങിയ നൈൻ സിംഗ് റാവത്തിനെ ‘പണ്ഡിറ്റ് നമ്പർ വൺ’ എന്നാണ് പിന്നീട് സർവേ ഓഫ് ഇന്ത്യ വിശേഷിപ്പിച്ചത്.
റാവത്തിന്റെ രഹസ്യ സർവേ രീതികൾ അന്താരാഷ്ട്ര തലത്തിൽ തന്നെ ഏറെ ചർച്ച ചെയ്യപ്പെട്ട ഒന്നായിരുന്നു. ഓരോ ചുവടും കൃത്യമായ ഒരേ നീളത്തിൽ വെക്കാൻ പ്രത്യേക പരിശീലനം നേടിയ അദ്ദേഹം, ഒരു കിലോമീറ്റർ എന്നത് 2,000 ചുവടുകൾ എന്ന നിലയിലാണ് കണക്കാക്കിയിരുന്നത്. ചുവടുകൾ എണ്ണുന്നതിനായി ബുദ്ധമതക്കാർ ഉപയോഗിക്കുന്ന ജപമാലയിലെ 108 മണികൾക്ക് പകരം 100 മണികളുള്ള പ്രത്യേക മാലയാണ് അദ്ദേഹം ഉപയോഗിച്ചത്. ഓരോ 100 ചുവടുകൾ പൂർത്തിയാകുമ്പോഴും ഓരോ മണി വീതം നീക്കിക്കൊണ്ട് മറ്റുള്ളവർക്ക് സംശയം തോന്നാത്ത വിധം ദൂരം കൃത്യമായി അദ്ദേഹം രേഖപ്പെടുത്തി.
കൂടാതെ, പ്രാർത്ഥനാ ചക്രത്തിനുള്ളിലാണ് അദ്ദേഹം കോമ്പസ് ഒളിപ്പിച്ചിരുന്നത്. സർവേ ഉപകരണങ്ങളിൽ ഉപയോഗിച്ചിരുന്ന മെർക്കുറി ആകട്ടെ കൗറി ഷെല്ലുകൾക്കുള്ളിലാണ് സൂക്ഷിച്ചിരുന്നത്. ഭൂപ്രദേശങ്ങളെക്കുറിച്ചുള്ള നിർണായക വിവരങ്ങൾ പ്രാർത്ഥനകളെന്ന വ്യാജേന എഴുതി ചുരുളുകളാക്കി പ്രാർത്ഥനാ ചക്രത്തിനുള്ളിൽ തന്നെ ഒപ്പിയെടുത്തു. രാത്രികാലങ്ങളിൽ നക്ഷത്രങ്ങളുടെ സഹായത്തോടെ സെക്സ്റ്റന്റ് (Sextant) ഉപയോഗിച്ച് തന്റെ സ്ഥാനം കൃത്യമായി നിർണയിക്കുകയും ചെയ്തു.
1866-ൽ ബുദ്ധ സന്യാസിയുടെ വേഷത്തിലാണ് റാവത്ത് ടിബറ്റിന്റെ തലസ്ഥാനമായ ലാസയിൽ എത്തിയത്. വിദേശികൾക്ക് അപ്രാപ്യമായിരുന്ന ആ നഗരത്തിന്റെ കൃത്യമായ സ്ഥാനവും ഉയരവും അദ്ദേഹം ആദ്യമായി രേഖപ്പെടുത്തി. ഇന്ത്യയിൽ ബ്രഹ്മപുത്ര എന്നറിയപ്പെടുന്ന സാങ്‌പോ നദിയുടെ ഗതിയും അദ്ദേഹം പിന്തുടർന്ന് കണ്ടെത്തി. തുടർന്നുള്ള യാത്രകളിൽ ആയിരത്തോളം കിലോമീറ്ററുകൾ കാൽനടയായി സഞ്ചരിച്ച് ടിബറ്റിലെ വ്യാപാരപാതകളും നദികളും സ്വർണനിക്ഷേപ മേഖലകളും അദ്ദേഹം ലോകത്തിന് പരിചയപ്പെടുത്തി.
റാവത്തിന്റെ ഈ സമാനതകളില്ലാത്ത സംഭാവനകൾക്ക് അന്താരാഷ്ട്ര തലത്തിൽ വലിയ അംഗീകാരങ്ങളും തേടിയെത്തി. 1877-ൽ റോയൽ ജിയോഗ്രഫിക്കൽ സൊസൈറ്റിയുടെ ഗോൾഡ് മെഡൽ നേടിയ ആദ്യ ഇന്ത്യക്കാരനായി അദ്ദേഹം മാറി. ജീവിച്ചിരുന്ന മറ്റേതൊരു മനുഷ്യനേക്കാളും ഏഷ്യയുടെ ഭൂപടത്തിലേക്ക് കൂടുതൽ ഭൂമിശാസ്ത്രപരമായ വിവരങ്ങൾ നൽകിയ വ്യക്തിയാണ് നൈൻ സിംഗ് റാവത്ത് എന്ന് പ്രമുഖ ഭൂമിശാസ്ത്രജ്ഞനായ ഹെന്റി യൂൾ അദ്ദേഹത്തെ പ്രശംസിക്കുകയുണ്ടായി. രാജ്യത്തിന്റെ ചരിത്രത്തിൽ മായാത്ത മുദ്ര പതിപ്പിച്ച ഈ മഹത് വ്യക്തിക്ക് ബ്രിട്ടീഷ് സർക്കാർ രണ്ട് ഗ്രാമങ്ങൾ സമ്മാനമായി നൽകുകയും ചെയ്തു.
