തിരുവനന്തപുരം: ഇനി എത്തുന്നിടത്തെല്ലാം മാധ്യമങ്ങളെ കാണില്ലെന്നും മുഖ്യമന്ത്രി വി.ഡി. സതീശൻ പ്രതികരിക്കുന്നുണ്ടെങ്കിൽ അക്കാര്യം മുൻകൂട്ടി അറിയിക്കുമെന്നും മുഖ്യമന്ത്രിയുടെ ഓഫീസ്. മുഖ്യമന്ത്രി എത്തുന്നയിടങ്ങളിലെല്ലാം മാധ്യമപ്രവർത്തകർ ചാനൽ മൈക്കുകളുമായി പ്രതികരണത്തിനായി സമീപിക്കുകയും അദ്ദേഹം മറുപടി പറയാതെ പോകുമ്പോൾ അത് വാർത്തയാക്കുകയും ചെയ്യുന്ന പ്രവണത കൂടിയ സാഹചര്യത്തിലാണ് ഔദ്യോഗിക പ്രതികരണങ്ങൾക്ക് നിയന്ത്രണമേർപ്പെടുത്താൻ തീരുമാനം. ഇനി മുതൽ ആഴ്ചയിലൊരിക്കൽ, അതായത് എല്ലാ ബുധനാഴ്ചകളിലും മന്ത്രിസഭായോഗത്തിന് ശേഷമായിരിക്കും മുഖ്യമന്ത്രി മാധ്യമങ്ങളെ കാണുക. ഇതിന് പുറമെ അടിയന്തര സാഹചര്യങ്ങൾ ഉണ്ടായാൽ മുൻകൂട്ടി അറിയിപ്പ് നൽകിയ ശേഷം മാത്രമായിരിക്കും മാധ്യമങ്ങൾക്ക് മുൻപിൽ അദ്ദേഹം എത്തുക.
മുഖ്യമന്ത്രി പോകുന്ന വഴികളിലും പരിപാടികളിലും വച്ച് മാധ്യമപ്രവർത്തകർ ചോദ്യങ്ങളുമായി വളയുന്നതും പ്രതികരിക്കാത്തത് വാർത്തയാക്കുന്നതും ബോധപൂർവമാണെന്നാണ് മുഖ്യമന്ത്രിയുടെ ഓഫീസിന്റെ വിലയിരുത്തൽ. കൂടാതെ, വിവിധ വിഷയങ്ങളിൽ പ്രതിപക്ഷ സംഘടനകളുടെ പ്രതിഷേധം ശക്തമായ പശ്ചാത്തലത്തിൽ മുഖ്യമന്ത്രിയുടെ സുരക്ഷ ഉറപ്പാക്കുന്നതിനും ആളുകൾ അടുത്തെത്തുന്നത് തടയുന്നതിനും തൽക്കാലത്തേക്ക് നിയന്ത്രണം വേണമെന്ന് പോലീസും സുരക്ഷാ വിഭാഗവും ആവശ്യപ്പെട്ടിട്ടുണ്ട്.
വി.ഡി. സതീശന്റെ സുരക്ഷയും വാഹനവ്യൂഹവും വർധിപ്പിക്കണമെന്ന് ഇന്റലിജൻസ് വിഭാഗം നിർദേശിച്ചിരുന്നെങ്കിലും അദ്ദേഹം മുൻപ് അത് നിരസിക്കുകയായിരുന്നു. എന്നാൽ, സുരക്ഷാ മുൻകരുതലുകളും വാർത്താസമ്മേളനങ്ങളുടെ ക്രമീകരണവും മുൻനിർത്തിയാണ് ഇപ്പോൾ ഈ നീക്കം.
