സാറ്റലൈറ്റ് ഇന്റർനെറ്റ് സേവനമായ ‘സ്റ്റാർലിങ്കിന്’ അനുമതി നൽകുന്നതിൽ ഇന്ത്യയിലെ കോടീശ്വരന്മാർ തടസ്സം നിൽക്കുന്നുവെന്ന ശതകോടീശ്വരൻ ഇലോൺ മസ്‌കിന്റെ ആരോപണങ്ങൾക്ക് ശക്തമായ മറുപടിയുമായി കേന്ദ്ര സർക്കാർ. സാറ്റലൈറ്റ് കമ്മ്യൂണിക്കേഷൻ സേവനങ്ങൾക്കായുള്ള രാജ്യത്തെ നിയമനിർമ്മാണവും ചട്ടങ്ങളും പൂർണ്ണമായും സുതാര്യവും പക്ഷപാതരഹിതവുമാണെന്ന് വാർത്താ വിതരണ പ്രസ് ഇൻഫർമേഷൻ ബ്യൂറോ (PIB) വഴി ടെലികോം മന്ത്രാലയം പുറത്തിറക്കിയ വാർത്താക്കുറിപ്പിൽ വ്യക്തമാക്കി. മസ്‌കിന്റെ പേര് നേരിട്ട് പരാമർശിക്കാതെയാണ് കേന്ദ്രത്തിന്റെ മറുപടി.
ഇന്ത്യൻ ജനതയ്ക്ക് മേലുള്ള കുത്തക നിലനിർത്താൻ ചില ധനികർ (Oligarchs) സ്റ്റാർലിങ്കിനെ തടയാൻ ശ്രമിക്കുകയാണെന്നും അവർ ആരാണെന്ന് നിങ്ങൾക്ക് ഊഹിക്കാമല്ലോ എന്നും എക്‌സ് (X) പ്ലാറ്റ്‌ഫോമിലൂടെ മസ്‌ക് ആരോപിച്ചിരുന്നു. എന്നാൽ ഇത്തരം ആരോപണങ്ങൾ അടിസ്ഥാനരഹിതവും വാസ്തവവിരുദ്ധവുമാണെന്ന് കേന്ദ്ര മന്ത്രാലയം വ്യക്തമാക്കി. സാറ്റലൈറ്റ് ഇന്റർനെറ്റ് രംഗത്ത് പ്രവർത്തിക്കാൻ മൂന്ന് പ്രമുഖ കമ്പനികൾക്കാണ് ലൈസൻസ് നൽകിയിട്ടുള്ളത്. ഇലോൺ മസ്‌കിന്റെ സ്റ്റാർലിങ്ക്, റിലയൻസ് ജിയോ, എയർടെൽ പിന്തുണയുള്ള വൺവെബ് (OneWeb) എന്നീ കമ്പനികളാണവ.
ഈ മൂന്ന് കമ്പനികളുടെയും സുരക്ഷാ പരിശോധനകളും അനുമതി നടപടികളും ഒരേ ഘട്ടത്തിലാണ് നിലവിലുള്ളത്. ദേശീയ സുരക്ഷയുമായി ബന്ധപ്പെട്ട പരിശോധനകൾ പൂർത്തിയാകുന്ന മുറയ്ക്ക് മാത്രമേ കമ്പനികൾക്ക് അടുത്ത ഘട്ടമായ സ്‌പെക്ട്രം അനുവദിക്കൽ പ്രക്രിയയിലേക്ക് കടക്കാനാകൂ. അതിൽ ആർക്കും ഒരു പ്രത്യേക മുൻഗണനയോ വിവേചനമോ കാണിച്ചിട്ടില്ലെന്നും കേന്ദ്രം വ്യക്തമാക്കി. അതേസമയം, ഇന്ത്യയുടെ സുരക്ഷാ മാനദണ്ഡങ്ങൾക്ക് വിധേയമായി പ്രവർത്തിക്കാൻ സ്റ്റാർലിങ്ക് സജ്ജമാണെന്നും, ഇന്ത്യൻ ഉപയോക്താക്കളുടെ ഡാറ്റ രാജ്യത്തിനുള്ളിൽ തന്നെ സുരക്ഷിതമായി സൂക്ഷിക്കുമെന്നും സ്റ്റാർലിങ്ക് വൈസ് പ്രസിഡന്റ് ലോറൻ ഡ്രെയർ ഇന്ത്യ മൊബൈൽ കോൺഗ്രസിൽ അറിയിച്ചു.
