ദുബായിൽ നിന്ന് തെൽ അവീവിലേക്ക് പറന്ന ഫ്ലൈദുബായ് വിമാനത്തെ വലിയൊരു ദുരന്തത്തിൽ നിന്ന് രക്ഷിച്ച ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിന് ഇസ്രായേലിന്റെ പരമോന്നത പൗരബഹുമതി പ്രഖ്യാപിച്ചു. സഹപൈലറ്റിന്റെ അക്രമത്തെ ജീവൻ പണയം വെച്ചും ചെറുത്തുതോൽപ്പിച്ച് 172 യാത്രികരുടെയും ജീവനക്കാരുടെയും ജീവൻ രക്ഷിച്ചതിനാണ് ഇസ്രായേൽ പ്രസിഡന്റ് ഐസക് ഹെർസോഗ് ഈ വലിയ ആദരം പ്രഖ്യാപിച്ചത്. പരിക്കേറ്റ് ചികിത്സയിൽ കഴിയുന്ന സ്മിത് മച്ചാർ പൂർണ്ണ ആരോഗ്യവാനായി തിരിച്ചെത്തിയ ശേഷം ജെറുസലേമിൽ വെച്ച് ഇസ്രായേലിന്റെ ‘സിവിലിയൻ ഹീറോയിസം’ പുരസ്കാരം നേരിട്ട് കൈമാറുമെന്ന് പ്രസിഡന്റ് വ്യക്തമാക്കി.
സ്മിതിന്റെ വീരകഥ ഇന്ത്യയ്ക്കും ഇസ്രായേലിനും ലോകമെമ്പാടുമുള്ള ജനങ്ങൾക്കും ഒരുപോലെ പ്രചോദനമാണെന്ന് പ്രസിഡന്റ് ഹെർസോഗ് അഭിപ്രായപ്പെട്ടു. ഗുരുതരമായ പരിക്കുകളിൽ നിന്ന് അബുദാബിയിലെ ആശുപത്രിയിൽ നിലവിൽ സുഖം പ്രാപിച്ചു വരുന്ന സ്മിതിന് ഇസ്രായേൽ പ്രസിഡന്റ് പ്രത്യേക കത്തയക്കുകയും ചെയ്തു. കത്തിൽ അദ്ദേഹത്തിന്റെ അസാമാന്യ ധൈര്യത്തെയും കൃത്യനിഷ്ഠയെയും അത്യധികം പ്രശംസിച്ച അദ്ദേഹം, നൂറു വർഷങ്ങൾക്ക് മുൻപ് വിശുദ്ധ നാട്ടിൽ പോരാടിയ ഇന്ത്യൻ സൈനികരുടെ ധീരതയോടാണ് സ്മിതിന്റെ പ്രവർത്തിയെ ഉപമിച്ചത്.
കൂടാതെ അമേരിക്കൻ കോൺഗ്രസിലെ ജനപ്രതിനിധികളും സ്മിത് മച്ചാറിന്റെ സമയോചിതമായ വീരകൃത്യത്തെ പ്രശംസിച്ച് പ്രത്യേക പ്രമേയം അവതരിപ്പിച്ചിട്ടുണ്ട്. ലോകമെമ്പാടുമുള്ള ആളുകൾ ഈ ഇന്ത്യൻ പൈലറ്റിന്റെ ധീരമായ ഇടപെടലിനെ നെഞ്ചിലേറ്റുകയാണ്. വിമാനത്തിനുള്ളിൽ സഹപൈലറ്റിൽ നിന്ന് ക്രൂരമായ ആക്രമണം നേരിട്ടിട്ടും ധീരമായി പോരാടിയ ക്യാപ്റ്റൻ സ്മിതിന്റെ സമയോചിതമായ ഇടപെടലാണ് വൻ ദുരന്തം ഒഴിവാക്കിയത്. അക്രമത്തിന് ഇരയായി ഗുരുതരമായി പരിക്കേറ്റിട്ടും വിമാനത്തിന്റെ നിയന്ത്രണം നഷ്ടപ്പെടാതെ അടിയന്തര സാഹചര്യങ്ങൾ കൈകാര്യം ചെയ്യാൻ അദ്ദേഹത്തിന് കഴിഞ്ഞു. തുടർന്ന് വിമാനത്തിലുണ്ടായിരുന്ന മറ്റ് യാത്രികരുടെയും ക്യാബിൻ ക്രൂവിന്റെയും സഹായത്തോടെ അക്രമിയെ കീഴടക്കുകയും വിമാനം സുരക്ഷിതമായി സൗദി അറേബ്യയിലെ തബൂക്കിൽ ഇറക്കുകയുമായിരുന്നു.
