2,500 വർഷം പഴക്കമുള്ള മമ്മികൾ കണ്ടെത്തി ഈജിപ്തിലെ പുരാവസ്തു ഗവേഷകർ. 40 അടിയോളം താഴ്ച്ചയുള്ള കിണറ്റിൽ നിന്നാണ് പുരാവസ്തു ഗവേഷകർ 13 ശവപ്പെട്ടികളും അതിനകത്ത് മമ്മികളും കണ്ടെത്തിയത്.ഇതിനു പിന്നിൽ പ്രവർത്തിച്ച ഈജിപ്തിന്റെ ടൂറിസം ആൻഡ് ആന്റിക്വിറ്റീസ് മന്ത്രാലയമാണ് ഇക്കാര്യം ഫേസ്ബുക്കിലൂടെ പുറത്തു വിട്ടത്. ശവപ്പെട്ടിക്ക് പുറത്തുള്ള നിറങ്ങളും ഡിസൈനുകളും ഇത്രയും വർഷങ്ങൾക്കു ശേഷവും വ്യക്തമായി കാണാൻ സാധിക്കുന്നുണ്ട് എന്നത് പുരാവസ്തു ഗവേഷകരിൽ അത്ഭുതമുളവാക്കുന്നുണ്ട്.
ഇത്തരമൊരു കണ്ടെത്തലിന് സാക്ഷ്യം വഹിക്കാൻ സാധിച്ചതിൽ തനിക്കു വളരെയധികം സന്തോഷമുണ്ടെന്ന് ഈജിപ്തിലെ ടൂറിസം ആൻഡ് ആന്റിക്വിറ്റീസ് വകുപ്പ് മന്ത്രി ഖാലിദ് എൽ-എനാനി പറഞ്ഞു. ഈജിപ്തിന്റെ തലസ്ഥാന നഗരിയായ കെയ്റോയുടെ തെക്കു ഭാഗത്തുള്ള സഖാറയിൽ നിന്നാണ് പുരാവസ്തു ഗവേഷകർ ഈ സുപ്രധാന കണ്ടെത്തൽ നടത്തിയത്.സ്റ്റെപ്പ് പിരമിഡ് സ്ഥിതി ചെയ്യുന്ന സഖാറയെന്ന ഈ പ്രദേശത്തു നിന്ന് മുമ്പും ഇത്തരം കണ്ടെത്തലുകൾ നടത്തിയിട്ടുണ്ട്.
