സായുധ സേനയിൽ ഒരു ലക്ഷത്തിലുമധികം ഒഴിവുകൾ : എത്രയും വേഗം നിയമനം നടത്താനുള്ള നടപടികൾ സ്വീകരിക്കുമെന്ന് ആഭ്യന്തര മന്ത്രാലയം

ന്യൂഡൽഹി : സായുധ സേനയിൽ ഒരുലക്ഷത്തിലധികം ഒഴിവുകളുണ്ടെന്ന് കേന്ദ്ര ആഭ്യന്തര മന്ത്രാലയം. ബിഎസ്എഫ്, സിആർപിഎഫ് ഉൾപ്പെടെയുള്ള സേനകളിൽ ഒഴിവുകളുള്ള കാര്യം രാജ്യസഭയിൽ ആഭ്യന്തര സഹമന്ത്രി നിത്യാനന്ദ റായിയാണ് അറിയിച്ചത്. വിരമിക്കൽ, മരണം, രാജി എന്നീ കാരണങ്ങളാലാണ് വിവിധ തസ്തികകളിലായി ഇത്രയുമധികം ഒഴിവുകൾ വന്നതെന്നും അദ്ദേഹം വ്യക്തമാക്കി. ഒഴിവുള്ള തസ്തികകളിലേക്കുള്ള നിയമനം എത്രയും വേഗം നടത്തുമെന്ന് കേന്ദ്ര ആഭ്യന്തര സഹമന്ത്രി അറിയിച്ചിട്ടുണ്ട്.

ബിഎസ്എഫിൽ 28,926 ഒഴിവുകളും സിആർപിഎഫിൽ 26,506 ഒഴിവുകളുമാണ് ഉള്ളത്. കൂടാതെ, സിഐഎസ്എഫിൽ 23,906 ഒഴിവുകളും എസ്എസ്ബിയിൽ 18,643 ഒഴിവുകളും ഐടിബിപി,അസാം റൈഫിൾസ് തുടങ്ങിയ സേനകളിൽ അയ്യായിരത്തിലുമധികം ഒഴിവുകളുമുണ്ട്. ഏറ്റവും കൂടുതൽ ഒഴിവുകളുള്ള കോൺസ്റ്റബിൾ തസ്തികയിൽ നിയമനം നടത്തുന്നതിന്റെ നടപടികൾ പുരോഗമിക്കുകയാണെന്ന് നിത്യാനന്ദ റായ് വ്യക്തമാക്കി. കോൺസ്റ്റബിൾ തസ്തികയിൽ അറുപതിനായിരത്തിലുമധികം ഒഴിവുകളാണുള്ളത്.