വഡോദര: ബറോഡ ക്യാപ്ടൻ ക്രുണാൽ പാണ്ഡ്യ ടീം അംഗങ്ങളുടെ മുന്നിൽ വെച്ച് തെറി പറയുന്നുവെന്ന ആരോപണവുമായി സഹതാരം ദീപക് ഹൂഡ. ക്രുണാല്‍ മോശമായി പെരുമാറിയെന്നും കരിയര്‍ അവസാനിപ്പിക്കുമെന്ന് ഭീഷണിപ്പെടുത്തിയതായും കാട്ടി ഹൂഡ ബറോഡ ക്രിക്കറ്റ് അസോസിയേഷന് പരാതി നൽകി.
ഇന്ത്യയില്‍ കോവിഡ് മൂലമുണ്ടായ ഇടവേളയ്ക്കു ശേഷം ആഭ്യന്തര മത്സരങ്ങള്‍ പുനരാരംഭിക്കാനിരിക്കെയാണ് പുതിയ വിവാദം. സംഭവത്തെ തുടര്‍ന്ന് സയ്യിദ് മുഷ്താഖ് അലി ടൂര്‍ണമെന്റില്‍ നിന്നും പിന്മാറുന്നതായും ഹൂഡ അറിയിച്ചു. വഡോദരയിലെ റിലയന്‍സ് സ്റ്റേഡിയത്തില്‍ പരിശീലിക്കവെയാണ് സംഭവമെന്ന് ഹൂഡ പരാതിയിൽ പറയുന്നു.
ബറോഡ ക്രിക്കറ്റ് അസോസിയേഷനു വേണ്ടി കഴിഞ്ഞ 11 വര്‍ഷമായി കളിക്കുന്നുണ്ട്. നിലവില്‍ സയ്യിദ് മുഷ്താഖ് അലി ടൂര്‍ണമെന്റിനുള്ള ടീമിലേക്കും തിരഞ്ഞെടുക്കപ്പെട്ടിരിക്കുകയാണ്. എന്നാല്‍ കടുത്ത നിരാശയിലും സമ്മര്‍ദത്തിലുമാണ് താനെന്നും പരാതിയിൽ ഹൂഡ വിശദീകരിക്കുന്നു.
ഓസ്ട്രേലിയയിൽ ഇന്ത്യൻ താരങ്ങൾ വംശീയ അധിക്ഷേപത്തിന് വിധേയരാകുന്നത് അന്താരാഷ്ട്ര കായിക രംഗത്ത് ചർച്ചാ വിഷയമാകുമ്പോഴാണ് ഇന്ത്യൻ ക്രിക്കറ്റിന്റെ ശോഭ കെടുത്തുന്ന ഇത്തരം വിവാദങ്ങൾ.
