കുവൈത്ത്‌സിറ്റി: മൂന്ന് ദിവസത്തെ ഔദ്യോഗിക സന്ദര്‍ശനത്തിന്റെ ഭാഗമായി ബുധനാഴ്ച കുവൈത്തിലെത്തിയ കേന്ദ്ര വിദേശകാര്യ മന്ത്രി എസ് ജയ് ശങ്കര്‍ കുവൈത്ത് പ്രധാനമന്ത്രി ഷേഖ് ഖാലീദ് സബാ ഖാലിദ് അല്‍ അല്‍ സബായുമായിട്ട് കൂടിക്കാഴ്ച നടത്തി. കുവൈത്ത് അമീര്‍ ഷേഖ് നവാഫ് അല്‍ അഹമ്മദ് അല്‍ ജാബെര്‍ അല്‍ സാബായ്ക്ക് കൈമാറാനായി പ്രധാനമന്ത്രി നരേന്ദ്രമോദി കൊടുത്ത് വിട്ട കത്ത് മന്ത്രി കൈമാറി.
കോവിഡ് പകര്‍ച്ചവ്യാധിയുടെ രണ്ടാം തരംഗത്തിനിടയില്‍ കുവൈത്ത് ഇന്ത്യയ്ക്ക് നല്‍കിയ സഹായങ്ങള്‍ക്ക് നന്ദി പ്രകാശിപ്പിക്കാനും, ഇന്ത്യ-കുവൈത്ത് നയതന്ത്ര ബന്ധത്തിന്റെ 60-ാം വാര്‍ഷികത്തോട് അനുബന്ധിച്ച്‌ ഒരു വര്‍ഷം നീണ്ട് നിലക്കുന്ന വിവിധ പരിപാടികളേടെ ഭാഗമായിട്ടുമാണ് സന്ദര്‍ശനം.
വിദേശകാര്യ മന്ത്രിയും മന്ത്രിസഭാ സഹമന്ത്രിയുമായ ഷെയ്ഖ് ഡോ. അഹമ്മദ് അല്‍ നാസര്‍, ഡെപ്യൂട്ടി അസിസ്റ്റന്റ് വിദേശകാര്യ മന്ത്രി അബ്ദുള്‍ റസിക് ഹമ്മൂദ് അല്‍ ഖലീഫ, കുവൈത്തിലെ ഇന്ത്യന്‍ സ്ഥാനപതി സിബി ജോര്‍ജ്,കുവൈറ്റിന്റെ ഇന്ത്യ അംബാസഡര്‍ ജാസെം ഇബ്രാഹിം അല്‍ നജീം, ഇന്ത്യയില്‍ നിന്നെത്തിയ പ്രതിനിധി സംഘവും കൂടിക്കാഴ്ചയില്‍ സംബന്ധിച്ചിരുന്നു.
നേരത്തെ മന്ത്രി ജയ്ശങ്കര്‍ വിദേകാര്യ വകുപ്പ് ഷെയ്ഖ് ഡോ. അഹമ്മദ് അല്‍ നാസര്‍ അല്‍ സബായുമായും ചര്‍ച്ച നടത്തിയിരുന്നു. ഉഭയകക്ഷിബന്ധം കൂടുതല്‍ ശക്തമാക്കുന്നതിനും ഫലപ്രദവുമായ ചര്‍ച്ചയാണ് കുവൈത്ത് വിദേകാര്യ വകുപ്പ് മന്ത്രിയുമായി നടന്നതെന്ന് മന്ത്രി ജയ്ശങ്കര്‍ തന്റെ ട്വിറ്റര്‍ അക്കൗണ്ടില്‍ വ്യക്തമാക്കി.
