ഢാക്ക: മത്സരത്തിനിടെ അമ്പയർക്കെതിരെ മോശമായി പെരുമാറിയതിന് മുൻ ബംഗ്ലാദേശ് ക്രിക്കറ്റ് ടീം ക്യാപ്ടൻ ഷക്കീബ് അൽ ഹസന് വിലക്ക്. ഢാക്ക പ്രീമിയർ ലീഗിലെ നാല് മത്സരങ്ങളിൽ നിന്നാണ് ഷക്കീബിനെ വിലക്കിയിരിക്കുന്നത്.
തനിക്ക് അനുകൂലമായി തീരുമാനം എടുക്കാത്ത അമ്പയറുടെ നടപടിയിൽ പ്രതിഷേധിച്ച് ഷക്കീബ് ആദ്യം സ്റ്റമ്പുകളിൽ തൊഴിക്കുകയും പിന്നീട് അവ പിഴുതെടുക്കുകയും ചെയ്തിരുന്നു. മുഹമ്മദൻ സ്പോർട്ടിംഗ് ക്ലബിന്റെ ക്യാപ്ടനായ ഷക്കീബിന്റെ പ്രവൃത്തി സാമൂഹിക മാധ്യമങ്ങളിൽ പ്രചരിച്ചിരുന്നു. വീഡിയോയിൽ ഷക്കീബ് അമ്പയറോട് കയർക്കുന്നതും കാണാമായിരുന്നു. കൂടാതെ ബംഗ്ലാദേശ് ക്രിക്കറ്റ് ബോർഡ് ഡയറക്ടർ ഖാലിദ് മഹ്മൂദിനോടും ഷക്കീബ് തട്ടിക്കയറി.
മത്സരശേഷം ഷക്കീബ് ക്ഷമാപണം നടത്തിയിരുന്നു. ഐസിസിയുടെ അഴിമതി വിരുദ്ധ ചട്ടങ്ങൾ ലംഘിച്ചതിന് ഷക്കീബിന് കഴിഞ്ഞ വർഷം 12 മത്സരങ്ങളിൽ വിലക്ക് ലഭിച്ചിരുന്നു.
