ദുബായ്: ഓസീസ് താരം ഗ്ലെൻ മാക്സ്വെൽ ഓസ്ട്രേലിയൻ ക്രിക്കറ്റ് ടീമിന്റെ പാക്കിസ്ഥാൻ പര്യടനത്തിനില്ലെന്ന് റിപ്പോർട്ട്. ഇന്ത്യൻ വംശജ വിനി രാമനുമായുള്ള വിവാഹത്തിന് തയാറെടുക്കുന്ന സാഹചര്യത്തിലാണ് മാക്സ്വെൽ ഇങ്ങിനെയൊരു തീരുമാനം എടുത്തതെന്നാണ് റിപ്പോർട്ട്. ഓസ്ട്രേലിയയുടെ പാക്കിസ്ഥാൻ പര്യടനം പ്രഖ്യാപിച്ചിരിക്കുന്ന മാർച്ച്-ഏപ്രിൽ സമയത്താണ് മാക്സ്‍വെലിന്റെ വിവാഹവും തീരുമാനിച്ചിരിക്കുന്നത്. ഈ സാഹചര്യത്തിലാണ് പര്യടനത്തിൽനിന്ന് വിട്ടുനിൽക്കാൻ മാക്സ്വെൽ ആലോചിക്കുന്നത്.
ഓസ്ട്രേലിയയിൽ ഫാർമസിസ്റ്റായി ജോലി ചെയ്യുന്ന വിനി രാമനും മാക്സ്‍വെലുമായുള്ള വിവാഹ നിശ്ചയം 2020 മാർച്ചിൽ കഴിഞ്ഞതാണ്. അതിനു ശേഷം കോവിഡ് വ്യാപനത്തിന്റെ പശ്ചാത്തലത്തിൽ പലതവണ മാറ്റിവച്ച വിവാഹമാണ് ഇത്തവണ നടത്താൻ നിശ്ചയിച്ചിരിക്കുന്നത്.
‘ഓസ്ട്രേലിയൻ ടീം വീണ്ടും പാക്കിസ്ഥാനിലേക്കു പോകുന്നത് നല്ല കാര്യം തന്നെ. ഇതിനു മുൻപ് 1998ലാണ് ഏറ്റവും ഒടുവിൽ ഓസീസ് ടീം പാക്കിസ്ഥാനിൽ പര്യടനം നടത്തിയതെന്നാണ് എന്റെ ഓർമ. പക്ഷേ, പര്യടനത്തിനായി ഞാൻ പോകുമോ എന്നുള്ള കാര്യം ഉറപ്പില്ല. ഏതാണ്ട് ഇതേ സമയത്തു തന്നെയാണ് എന്റെ വിവാഹവും നിശ്ചയിച്ചിരിക്കുന്നത്. അതു കൊണ്ട് എന്നോട് അതേക്കുറിച്ച് ചോദിച്ചിട്ട് കാര്യമില്ല. പാക്കിസ്ഥാൻ പര്യടനത്തിനായി ഇനിയും വിവാഹം നീട്ടിവയ്ക്കാൻ യാതൊരു സാധ്യതയുമില്ല. ഇപ്പോൾത്തന്നെ പലതവണ വിവാഹം മാറ്റിവച്ചു കഴിഞ്ഞു’- മാക്സ്വെൽ പറഞ്ഞു.
