കബൂൾ: കാബൂളിൽ നിന്നുള്ള അപേക്ഷകർക്ക് പാസ്പോർട്ട് വിതരണം നിർത്തി വെച്ച് താലിബാൻ. യാത്രാക്കൂലി സ്വരൂപിക്കാൻ ശേഷിയുള്ളവർ ജീവനും കൊണ്ട് രാജ്യം വിടുന്ന സാഹചര്യത്തിലാണ് ഇതെന്നാണ് സൂചന. ആഭ്യന്തര മന്ത്രാലയത്തിന്റെ നിർദേശത്തെ തുടർന്നാണ് നടപടി.
എന്നാൽ തിരക്കൊഴിവാക്കാനാണ് നടപടി എന്നാണ് പാസ്പോർട്ട് വിഭാഗത്തിന്റെ മറുപടി. രാജ്യത്തിന്റെ മറ്റിടങ്ങളിൽ ഉള്ളവർക്ക് പാസ്പോർട്ടുകൾ നൽകുന്നുണ്ടെന്നും പാസ്പോർട്ട് വിഭാഗം അറിയിച്ചു. ഓൺലൈനായി അപേക്ഷിക്കുന്നവർക്ക് മാത്രമേ കാബൂളിൽ ഇനി മുതൽ പാസ്പോർട്ട് നൽകൂവെന്നും, എന്നാൽ ഇനി ഒരറിയിപ്പ് ഉണ്ടായാൽ മാത്രം അപേക്ഷകർ ഓൺലൈനായി അപേക്ഷിച്ചാൽ മതിയെന്നും അധികൃതർ അറിയിച്ചു.
അഫ്ഗാനിസ്ഥാനിൽ താലിബാൻ അധികാരം ഏറ്റെടുത്ത ശേഷം രാജ്യം വിടുന്നവരുടെ എണ്ണത്തിൽ വൻ വർദ്ധനവാണ് ഉണ്ടായിരിക്കുന്നത്. കർശനമായ മത നിയമങ്ങളും ഭീകരരുടെ നിയന്ത്രണവും സാമ്പത്തിക പ്രതിസന്ധികളും ജനങ്ങളെ വലയ്ക്കുകയാണ്.
