അഹമ്മദാബാദ്: വെസ്റ്റിൻഡീസിനെതിരായ രണ്ടാം ഏകദിന മത്സരത്തിലും തകർപ്പൻ ജയവുമായി പരമ്പര സ്വന്തമാക്കി ഇന്ത്യ. 44 റൺസിനാണ് ഇന്ത്യയുടെ വിജയം. അഹമ്മദാബാദിലെ നരേന്ദ്ര മോഡി സ്റ്റേഡിയത്തിൽ നടന്ന മത്സരത്തിൽ ടോസ് നഷ്ടമായി ആദ്യം ബാറ്റ് ചെയ്ത ഇന്ത്യ 237/9 എന്ന താരതമ്യേന ചെറിയ സ്കോറാണ് നേടിയത്. മറുപടി ബാറ്റിംഗിൽ 193 റൺസ് എടുക്കാനേ സന്ദർശകർക്ക് സാധിച്ചുള്ളൂ.
9 ഓവറുകളിൽ 12 റൺസ് മാത്രം വിട്ടു കൊടുത്ത് 4 വിൻഡീസ് വിക്കറ്റുകൾ പിഴുത വലം കൈയ്യൻ പേസർ പ്രസിദ്ധ് കൃഷ്ണയാണ് ഇന്ത്യയുടെ വിജയ ശില്പി. 49 റൺസെടുത്ത രാഹുലും 64 റൺസെടുത്ത സൂര്യകുമാർ യാദവുമാണ് ഇന്ത്യയുടെ പ്രധാന സ്കോറർമാർ. 24 റൺസ് നേടിയ വാഷിംഗ്ടൺ സുന്ദറും ഇന്ത്യൻ സ്കോറിലേക്ക് തന്റേതായ സംഭാവന നൽകി.
ഷമ ബ്രൂക്സ്, അകീൽ ഹൊസൈൻ, ഒഡിയൻ സ്മിത്ത് എന്നിവർ വെസ്റ്റിൻഡീസിന് വേണ്ടി പൊരുതാൻ ശ്രമിച്ചുവെങ്കിലും വിജയത്തിലെത്താൻ സാധിച്ചില്ല. നേരത്തെ ആദ്യ മത്സരത്തിലും ഇന്ത്യ വിജയിച്ചിരുന്നു. പരമ്പരയിലെ മൂന്നാമത്തെയും അവസാനത്തേയും മത്സരം 11ന് നടക്കും.
Discussion about this post